سیمه ییزو سرچینو رسنیو ته: په شمالي وزیرستان کې وژل شوي شپږ جنګیالي افغانان وو
د پاکستان ځايي چارواکي وايي، چې هغه شپږ جنګیالي چې په شمالي وزیرستان کې د فېبرورۍ په ۲۸ مه ووژل شول افغان اتباع او د تحریک طالبان پاکستان غړي وو. ځايي رسنیو د امنیتي سرچینو په حواله لیکلي، چې په پاکستان کې په «ترهګریزو» کړنو کې د افغان اتباعو لاس لرل یو ځل بیا تایید شوي دي.
د پاکستان ډان نیوز د سیمه ییزو سرچینو له خولې ویلي، چې په جګړه کې یو ۱۶ کلن ځانمرګی هم وژل شوی دی.
ډان نیوز د وژل شویو جنګیالیو هویت خپور کړی او لیکلي یې دي، چې د تحریک طالبان پاکستان جنګیالي د خوست، لوګر او پکتیکا ولایتونو اوسېدونکي وو.
تېره اونۍ د پاکستان امنيتي ځواکونو په شمالي وزيرستان کې شپږ وسله وال وژلي او په زياته اندازه وسلې او تجهيزات يې ترلاسه کړي دي.
تر دې مخکې پاکستاني چارواکو پر افغان طالبانو تور لګولی و، چې له تحریک طالبان پاکستان سره همکاري کوي او ادعا کوي چې ټي ټي پي په افغانستان کې اوسیږي او د امریکايي وسلو څخه په استفادې د پاکستان پر امنیتي ځواکونو بریدونه کوي.
خو طالبانو بیا دغه ادعا رد کړې او پاکستان ته یې سپارښتنه کړې، چې د نورو د ملامتولو پر ځای دې خپلې کورنۍ ستونزې په خپله حل کړي.
