د خېبرپښتونخوا په ټانګ ولسوالۍ کې ناڅرګندو وسله والو د یوه دولتي ښوونځي ښوونکی وژلی

سرچینې وايي، د خیبر پښتونخوا د ټانک ولسوالۍ په جهنډوله سیمه کې نن سهار د صوبتي کلا دولتي عالي لېسې د ښوونکي شبیر نومي مړی موندل شوی. ځايي پولیسو ويلي، نوموړی تېره ورځ شنبه د ناڅرګندو وسله والو له لوري تښتول شوی و.

په خیبرپښتونخوا کې خپلواک خبریال لال وزیر افغانستان انټرنشنل پښتو څانګې ته نن یک شنبه د (کب ۱۳مه) وويل چې د صوبتي کلا عالي لېسې دغه ښوونکی مخکې تر دې هم د تحریک طالبان پاکستان د وسله والو له لوري ګواښل شوی و.

لال وزیر وايي، دغه ښوونکی تېره ورځ ښوونځي ته پر لاره ناڅرګندو وسله والو له ځان سره بیولي و او نن سهار یې په ګولیو لګېدلی مړی موندل شوی.

د دغه وژل شوي شبیر نومي ښوونکي د کورنۍ یوه غړي، خبریال لال وزیر ته ویلي و چې له دې وړاندې هم په سیمه کې د ټي ټي پي وسله والو دغه ښوونکي ته د دندې پرېښودو ګواښ کړی و خو وايي د بېوزلۍ له امله یې دنده نه شوی پرېښودلی.

د دغه ښوونکي د وژلو په اړه تر اوسه پورې د ټي ټي پي وسله والې څه نه دي ويلي.

د ټي ټي پي وسله والې ډلې يوې څانګې په خیبرپښتونخوا کې د ښوونځیو ښوونکو ته خبرداري ورکړي چې خپلې دندې پریږدي، تر دې وړاندې هم د دغه ایالت په بنو، لکي مروت، شمالي او سوېلي وزیرستان، کورمه ایجنسۍ، مومند، باجوړ او خیبر ولسوالۍ کې د ښوونځیو ښوونکي وژل شوي وو.

د خیبرپښتونخوا اوسیدونکي د پاکستان حکومت د دغه ایالت په بېلابېلو سیمو کې د امنیت په راوستو کې پاتې بولي او وايي چې حکومت د یې امنیت وساتي خو حکومت تل د امنیت ټینګولو ډاډ ورکړی.