ټي ټي پي ته نږدې سرچینې د ملا حسن اخوند او مفتي نور ولي مسید ترمنځ لیدنه ردوي
ټي ټي پي ته نژدې سرچینو له افغانستان انټرنشنل - پښتو ته د جیو نیوز دا راپور رد کړ چې د طالبانو د رییس الوزرا ملا محمد حسن اخوند او د پاکستاني طالبانو د مشر مفتي نور ولي مسید ترمنځه ناسته شوې ده. دوی وايي، په پاکستان کې یې بریدونه دوام لري او وسلوال یې په دغه خاوره کې حضور لري.
پاکستاني طالبانو ته نږدې سرچینو دا خبرې د جيو نيوز د وروستي راپور په غبرګون کې کړې دي.
دا پاکستانۍ رسنۍ وايي، د تحريک طالبان پاکستان په مشرۍ وسلوالو ته افغان طالبانو د افغانستان له خاورې پر پاکستان د بريدونو په اړه خبردارى ورکړى.
دغې رسنۍ د پاکستان د عالمانو د پلاوي د یوه غړي له قوله چې کابل ته سفر کړی لیکلي: د ټي ټي پي دا ډول اقداماتو د دواړو هېوادونو اړیکې کمزورې کړې.دغه پاکستاني رسنۍ خبر ورکړی، چې د جمعیت علمای اسلام د سمیع الحق ګروپ د مشر مولانا حامد الحق په مشرۍ د پاکستاني دیني عالمانو یو پلاوی په دې وروستیو کې کابل ته تللی.
حامد الحق د مولانا سمیع الحق زوی دی او د طالبانو یو شمېر مشران د هغه له مدرسې دارالعلوم حقانيه فارغ شوي دي.
دغه لیدنه د دیني چارو د نړیوالې څیړنې د شورا د مشر اسرار مدني په همغږي ترسره شوه.
کابل ته د مولانا فضل رحمان له سفر وروسته دا کابل ته د پاکستاني عالمانو دویم سفر دی، چې له طالبانو سره د اسلام اباد د اړیکو د رغولو په موخه ترسره کېږي.
د جیونیوز د راپور له مخې، طالب مشرانو پاکستاني دیني عالمانو ته ویلي، چې شاوخوا څلور اونۍ وړاندې یوه غونډه جوړه شوې وه، چې په کې د تحریک طالبان پاکستان مشرانو لکه مفتي نور ولي محسود، حافظ ګل بهادر ګډون کړی و.
د افغان طالبانو په استازيتوب په دې غونډه کې د طالبانو لومړي وزير ملا محمد حسن او د هغوى يو شمېر وزيرانو ګډون کړى و.
په راپور کې راغلي چې په دې غونډه کې د تحریک طالبان پاکستان مشرتابه ته په ښکاره وویل شول، چې "په پاکستان کې دننه بریدونو د پاکستان له خلکو او حکومت سره د دوی اړیکې کمزورې کړې دي."
افغان او پاکستاني طالبانو په رسمي ډول د دې غونډې په اړه څه نه دي ویلي.
خو په همدې حال کې د افغان طالبانو امنیتي سرچینو افغانستان انټرنشنل ـ پښتو ته وویل، چې د پاکستاني طالبانو سره د اړیکو او تماس له پلوه ددې ډلې رییس الوزرا کوم رول نه لري او یوازې د طالبانو استخباراتو لوی ریاست او د کورنیو چارو وزارت له لارې پېغامونه رسول کیږي.
د طالبانو سرچینې وویل چې د دې ډلې واک ته رسېدو سره، څو میاشتې وروسته په کابل کې د ټي ټي پي او د پاکستاني حکومت ترمنځه د خبرو زمنیه هم د طالبانو د کورنیو چارو وزیر سراج الدین حقاني برابره کړې وه.
د طالبانو اکثره مشران او مذهبي شخصیتونه د خیبر پښتونخوا په اکوړه خټک کې په دارالعلوم حقانيه کې روزل شوي او اسلام اباد هڅه کوي چې د دغې مدرسې د مذهبي شخصیتونو د فشار له لارې د تحریک طالبان پاکستان او طالبانو ترمنځ همکاري کمه کړي.
اسرار مدني، چې د غونډې د همغږي کولو مسووليت يې پر غاړه و، د طالبانو د حکومتي چارواکو له خولې وويل، "له دې غونډې وروسته وضعيت ښه شوى دى."
خو ښاغلي مدني وویل، طالبان او په ځانګړې توګه د حقاني شبکه په دې باور ده، چې د پاکستان له تحریک طالبان سره د خبرو بیا پیل کولای شي اړیکې ښې کړي. خو پاکستاني چارواکي له دې نظر سره مخالف ښکاري. ځکه طالبانو له خبرو اترو څخه په استفادې سره د بندیانو د خلاصون په څېر امتیازات ترلاسه کړل، خو د پاکستان د حکومت تمه پوره نه شوه.
ښاغلي مدني دا هم وویل چې طالب چارواکو له پاکستاني دیني عالمانو سره په کتنه کې د پاکستاني کډوالو په زوره اېستلو خپله ناخوښي څرګنده کړه او د پاکستان له حکومته یې وغوښتل چې دغه بهیر ودروي.
