پر لبنان د اسراییل هوايي برید کې د حزبالله دوه غړي وژل شوي دي
په لبنان کې سرچینو رویټرز خبري اژانس ته ویلي، چې د اسراییل جنګي الوتکو د دوشنبې په ورځ د لبنان په بیکا دره کې بمباري کړې او لږ تر لږه د حزب الله دوه غړي یې وژلي دي.
د حزبالله ډلې پورې تړلي المنار ټلویزیون راپور ورکړی، چې حزب الله د اسراییل تر اشغال لاندې د ګولان په لوړو کې د اسراییلي پوځ په مرکزي دفتر ۶۰ راکټونه توغولي دي.
د اسراییل د پوځ یوه ویاند ویلي، لسګونه توغندي له لبنان څخه د ګولان پر لوړو توغول شوي دي.
دغه بریدونو د ۲۰۰۶ کال له جګړې راهیسې د حزب الله او اسرايیل تر منځ د تاوتریخوالی د ډېرېدو نښه ده، چې د غزې د جګړې د لا پراخېدو او سیمه ییزو جګړو احتمال لا پسې قوي کړی دی.
د اسراییل پوځ ویلي، جنګي الوتکو یې د اسراییل د بې پیلوټه الوتکې د غورځولو په غبرګون کې د بیکا په دره کې د حزب الله هوايي دفاعي اډې په نښه کړې دي.
حزب الله د دوشنبې په ورځ یوه اسراییلي بې پیلوټه الوتکه د یو توغندي پر مټ په نښه کړې وه.
