ایراني رسنۍ: د ایران ځوانوکو د جیش العدل ډلې یو مشر په پاکستان کې وژلی
د ایران د مهر خبري اژانس د جمعې په ورځ ویلي، چې ایراني ځواکونو د جیش العدل ډلې یو مشر اسماعیل شه بخش او د هغه ملګري په پاکستان د ترسره کړو پوځي عملیاتو پر مهال وژلي دي.
په دې راپور کې راغلي، چې دغه پوځي عملیات د دغه هیواد په سویل ختیځ کې د ترهګرو د ځپلو او په ایران کې د وروستۍ پيښو د عاملیونو د نیولو لپاره ترسره شوي وو.
د مهر خبري اژانس په وینا، دغه استخباراتي او پیچلي عملیات د اسماعیل شه بخش او د هغه د ملګرو د نیولو په موخه ترسره شوي وو، خو د هغوی له مقاومت وروسته شه بخش او ملګري یې وژل شوي دي.
په دغه راپور کې راغلي، چې د ایران له خاورې باندې دغه عملیات د ایران د اسلامي انقلابي د بهرنۍ څانګې د ځواکونو له خوا ترسره شوي دي.
پاکستان لا د دغو عملیاتو په اړه څه نه دي ویلي.
