پيپلز ګوند او مسلم ليگ نواز ډله د ګډ حکومت جوړولو لپاره «وروستي پړاو ته رسيدلي دي»
د پاکستانو رسنیو د راپورونو له مخې، د مسلم ليګ ن یا نواز او پيپلز ګوندونو تر منځ د حکومت جوړولو په اړه مثبت پرمختګ شوی. جیو نیوز نن د ځینې سرچینو په حواله لیکلي، پيپلز او مسلم ليګ نواز ګوندونه په پاکستان کې د اقتصادي او سياسي کړکېچ د له منځه وړلو په موخه «هوکړې ته رسیدلي دي.»
د دغو راپورونو پراساس، د پاکستان ولسمشرۍ او د ملي اسمبلۍ ریاست به پیپلز ګوند ته ورکول کېږي او د مشرانو جرګې د رییس او صوبو د اعلی وزیرانو په اړه به وروسته پرېکړه وشي.
جیو نیوز همداراز د سرچینو په حواله زیاته کړې، چې په بلوچستان کې به پيپلز پارټي او مسلم ليګ (ن) ګډ حکومت جوړوي او سر وزیر به پکې د پيپلز ګوند له خوا وي.
اخوا، پيپلز ګوند به په پنجاب کې هم د مسلم لیګ ن په کابينه کې برخه ولري.
د اټکلونو له مخې، پيپلز ګوند به په پنجاب صوبه کې دوه يا درې وزارتونه ترلاسه کړي.
د پاکستان تحریک انصاف ګوند دې ټاکنو کې تر نورو ګوندونو مخکې او ۹۲ پارلماني څوکۍ یې ګټلې دي.
په دې ټاکنو کې مسلم لیګ نواز ډلې د ۷۹ څوکیو په ګټلو له پیپلز ګوند سره، چې ۵۴ پارلماني څوکۍ یې ګټلې دي، د ګډ حکومت جوړولو هڅه پیل کړې ده.
