پاکستانۍ رسنۍ: په خیبرپښتونخوا او وزیرستان کې پاکستاني پوځ نهه وسله وال وژلي
پاکستانۍ رسنۍ د پوځ د رسنیز دفتر د خپرپاڼې په حواله لیکلي چې د دغه هيواد پوځ په خيبرپښتونخوا او وزیرستان کې په دوو جلا پېښو کې نهه وسله وال وژلي او په جګړه کې یې یو عسکر هم وژل شوی. د پوځ د خبرپاڼې له مخې په تېرو دوو ورځو کې یې د عملیاتو پر مهال دغه وسله وال وژلي دي.
د پاکستاني پوځ د معلوماتو له مخې د سوېلي وزیرستان په واڼه کې یې د عملیاتو پر مهال اووه وسله وال وژلي او له دوی څخه یې یو شمېر وسلې او مهمات هم نیولي دي.
د معلوماتو له مخې د خیبرپښتونخوا په ټانګ کې یې هم د یو لړ استخباراتي معلوماتو پر بنسټ دوه وسله وال وژلي چې د خبرپاڼې په ټکو په ډیرو امنیتي پېښو کې یې لاس لرل.
د پاکستاني پوځ د خبرپاڼې له مخې په دغو عملیاتو کې د دوی یو عسکر هم وژل شوی، خو دا یې نه دي ويلي چې په کومه سیمه کې وژل شوی.
د پوځ په خبرپاڼه کې ادعا شوې چې په سوېلې وزیرستان واڼه کې د اوو تنو وسله والو په منځ کې پنځه وسله وال یې د افغانستان وګړي و، هغه دعوه چې کابل کې طالبانو تل رد کړې ده.
تر اوسه پورې د دغو عملیاتو او زیانونو په اړه پاکستاني طالبانو لا څه نه دي ويلي.
