بلوچستان کې څلورو سیاسي ګوندونو په ګډه د بلوچستان او سند ترمنځ لارې د اعتراض په ډول تړلې
د بلوچستان ځايي خبریالان وايي، په دغه ایالت کې ځايي څلورو سیاسي ګوندونو د فبرورۍ په اتمه په ټاکنو کې د درغلیو او لاسوهنو په اعتراض کې د بلوچستان او سند ایالتونو ترمنځ لویې لارې د تګ راتګ پر مخ تړلې دي.
د پاکستان د بلوچستان ایالت څخه ځايي خبریالانو د یک شنبې په ورځ د (سلواغي ۲۹مه) راپور ورکړی چې په یاد ایالت کې څلورو ځايي سیاسي ګوندونو په ګډه د بلوچستان او سند ایالتونو تر منځ عمومي سړکونه د تګ راتګ پر مخ تړلي دي.
د دوی ځايي سیاسي ګوندونو دغه سړکونه د فبرورۍ په اتمه په ټاکنو کې د پراخو درغیلو او لاسوهونو په اعتراض کې بند کړي دي.
د خبریالانو د معلوماتو له مخې د یکشنبې له سهار راهیسې د کراچۍ، کویټې او کویټې ـ چمن تر منځ سلګونه باروړونکي او مساپر وړونکي موټرونه درول شوي او د اعتراض کوونکو له لوري د تګ راتګ اجازه نه ورکول کیږي.
بل خوا د بلوچستان ایالت د اطلاعاتو سرپرست وزیر جان اڅګزي وايي، په بلوچستان ایالت کې یې ټولو امنیتي ادارو ته امر کړی چې د مساپرو د تګ راتګ په لارو کې ټول خنډونه له منځه یوسي.
دا په داسې حال کې ده چې د پاکستان په ټولټاکنو کې د درغیلو د ادعا په اعتراض د کویټې او چمن په ګډون د پاکستان په بېلابېلو ښارونو کې لاریونونه او پرلتونه دوام لري.
