پاکستان: د ډیورنډ کرښې په اړه د طالبانو د بهرنیو چارو د وزارت د مرستیال خبرې خیالي دي
د پاکستان د بهرنیو چارو وزارت د افغانستان او پاکستان ترمنځ د پولې د نارسميتوب په اړه د طالبانو د بهرنیو چارو د وزارت د مرستیال شیرمحمد عباس ستانکزي څرګندونې «خودخواهانه او خیالي» بللي.
د دغه وزارت په اعلامیه کې راغلي چې طالبان دې د دغو خبرو پر ځای د پاکستان امنیتي اندېښنو ته رسیدګي وکړي.
د پاکستان د بهرنیو چارو وزارت د جمعې په ورځ (د سلواغې ۲۷مه)په یوې خپره کړې اعلامیه کې ویلي: "د افغانستان او پاکستان ترمنځ د پولې د قانونيتوب او سپېڅلوالي په اړه هر ډول خودخواهانه او خیالي ادعا، نشي کولای چې جغرافیایي، تاریخي او د نړیوالو حقونو واقعیتونه بدل کړي."
تر دې مخکې ښاغلي ستانکزي له افغانستانه د پخواني شوروي اتحاد د وتلو ۳۵ کلیزې لمانځعونډې ته ویلي، چې افغانستان په ټول عمر ډیورنډ په رسمیت نه دی پيژندلي او نه به یې وپيژنی.
ستانکزي وویل نیمه ټوټه افغانستان جلا دی او له ډیورنډ کرښې اخوا پروت دی.
عباس ستانکزي وویل، چې ډیورنډ کرښه انګرېزانو د افغانانو پر زړه تېره کړې ده او پر دغه کرښه اوښتو لپاره د پاکستان له خوا د د پاسپورټ او ویزې اصول پلي کول ورته د منلو نه دي او نه عملي کیدلی شي.
د پاکستان د بهرنیو چارو وزارت د طالبانو د بهرنیو چارو د مرستیال د دغو څرګندونو په غبرګون کې دغې ډلې ته سپارښتنه کړې چې د «داسې نامناسبه څرګندونو پرځای چې د خلکو پام بل لور ته اړوي» د پاکستان اصلي امنیتي اندېښنو ته دې پام وکړي.
د پاکستان د بهرنیو چارو وزارت ویلي، چې د پولې دواړو غاړو ته د خلکو او سوداګریزو توکو د تګ راتګ لپاره د نړۍوالو معیارونو پراساس اسانتیاوې برابروي.
د دواړو هېوادونو ترمنځ پر پوله لانجه کومه نوې خبره نه ده. په تېرو څو لسيزو کې د افغانستان ټولو حکومتونو دغه پوله په رسمیت نه ده پیژندلې. د کرزي د حکومت پر مهال، ټولو دولتي ادارو ته ویل شوي و، چې دغه پوله "د ډیورند د فرضي کرښې" په نوم یاده کړي. خو پاکستان وايي، چې دا د دواړو هېوادونو تر منځ رسمي پوله ده او په نړیواله کچه په رسمیت پیژندل شوې.
