د پاکستان تحریک انصاف ګوند د لومړي وزارت لپاره عمر ایوب نوماند کړ
د پاکستان تحریک انصاف ګوند مهم غړی او د قامي اسمبلۍ پخوانی مشر اسد قیصر وايي، دغه ګوند خپل سرمنشي عمر ایوب د راتلونکي لومړي وزارت څوکۍ ته نوماند کړی دی. اسد قیصر نن په اډیاله جېل کې له عمران خان سره تر لیدنې وروسته وویل، چې له ښاغلي خان سره په مشوره یې عمر ایوب کاندید کړی دی.
د عمران خان ګوندي ملګرو او پلوي کاندیدانو د تېرې اونۍ ټولټاکنو کې د ۹۲ څوکیو ګټلو سره د پارلمان تر ټولو ډېر سېټونه ګټلي دي.
په دې ټاکنو کې مسلم لیګ نواز ډلې د ۷۹ څوکیو په ګټلو له پیپلز ګوند سره، چې ۵۴ پارلماني څوکۍ یې ګټلې دي، د ګډ حکومت جوړولو هڅه پیل کړې ده.
مسلم لیګ نواز ډلې د لومړي وزارت لپاره شهباز شریف نوماند کړی او د پیپلز ګوند مشر اصف زرداري ته یې د ولسمشرۍ وړاندیز کړی دی.
تحریک انصاف په داسې مهال لومړي وزارت ته نوماندېږي چې رویټرز خبري اژانس وايي، د عمران خان ملاتړي پخپله حکومت نشي جوړولی او وجه یې هم دا ده چې د ګوند په توګه یې ټاکنو کې ګډون نه دی کړی.
د پاکستان ټاکنو کمېسون له هغه وروسته له دغه ګوند د بېټ نښان واخیست چې د عمران خان تر بندي کېدو وروسته یې ګوندي ټاکنو کې ګوهر علي خان مشر وټاکه، خو د ټاکنو کمېسون دا ګوندي انتخابات بې معیاره وبلل.
