طالبان: وردګو ولايت کې د جنازې پر مهال د جومات چت راپرېوتو له امله ۱۵ کسان ټپیان شوي

د وردګو ولایت لپاره د طالبانو امنیه قوماندانۍ مسوولانو ويلي چې د دغه ولايت په نرخ ولسوالۍ کې د جنازې لمانځه پر مهال د یوه جومات چت راپرېوتی او تر ۱۵ پورې لمونځ کوونکي یې ټپیان کړي. ويل کیږي دغه پېښه پرون ناوخته رامنځته شوې ده.

د دغه ولایت امنیه قوماندانۍ وياند یوسف اسرار ویلي چې دغه جومات د نرخ ولسوالۍ په عمرخيلو کلي کې راپریوتی.
د وردګو ولايت د طالبانو اطلاعات او فرهنګ ریاست نن چهارشنبه د (سلواغې ۲۵مه) په ایکس پاڼه لیکلي چې د جنازې پر مهال په دغه پېښه کې ټپیان شوي کلیوال یې د وردګو ولايتي روغتون ته لیږدولي او د ځینو هغو روغتیایي حالت یې نازک ښودلی.
د سیمې خلکو ویلي چې د عمرخيلو کلي خلک دغلته په ټرافیکي پیښه کې د یوه مړه شوي کس د جنازې لمانځه په ادا کولو بوخت و چې پرې د جومات چت راپرېوت.
تر دې مخکې هم د افغانستان په ځینو ولایتونو کې د خلکو ګڼې ګوڼې پر مهال د خټینو ودانیو چتونه راپرېوتي او خلکو ته یې مرګ ژوبله اړولې.