د پاکستان د مالیې وزارت له نړۍوال وجهي صندوق څخه شپږ میلیارده ډالره تازه پور اخلي
د پاکستان د ماليې وزارت خبر ورکړی، چې د پیسو له نړۍوال وجهي صندوق (ای ایم ایف) څخه د شپږ میلیارده ډالرو د پور اخیستو لپاره یې چمتووالی نیولی دی.
د سرچينې د معلوماتو له مخې؛ د ماليې وزارت له ای ایم ایف څخه د پور د نوي پروګرام د ترلاسه کولو لپاره چمتووالى بشپړ کړی او یاد پروګرام به د درېيو کلونو لپاره وي.
دوی وايي، چې له ای ایم ایف سره د پور د نوي پروګرام لپاره خبرې اترې به د دویمې اقتصادي کتنې سره ترسره شي او له نړۍوال وجهي صندوق څخه به د ۶ میلیارد ډالرو نوي پور پروګرام غوښتنه وشي.
ویل کیږي، چې د ای ایم ایف په شرایطو کې د ګازو بیه ښايي ۶۷ سلنه نوره هم ګرانه شي.
د مالیې وزارت د سرچینو په وینا؛ د نوي پور پروګرام لاندې به برېښنا او ګاز نور هم ګران شي او مختلفو سکتورونو ته ورکړل شوي سبسایډي به په مرحله واره توګه ختمه شي. د ټېکسونو په لړ کې به مختلفو سکټورونو ته ورکړل شوې استثنا هم ختمه کړل شي.
د پاکستان د مالیې وزارت سرچینې وايي، چې د پورونو نوی پروګرام به د اوسني معیار د موافقتنامې په پرتله د سختو شرایطو پر بنسټ وي.
ای ایم ایف به د راتلونکي مالي کال د بودیجې لپاره د مالیې وزارت ته وړاندیزونه ورکړي، چې د پلي کېدو لپاره به یې پاکستان تضمین ورکړي.
پاکستان لا له وړاندې یو له هغو هېوادونو څخه و، چې له نړۍوال وجهي صندوق څخه یې تر ټولو زیات پور اخیستی دی.
