حماس: په تېرو ۲۴ ساعتونو کې په غزه کې ۱۰۷ فلسطینیان وژل شوي
د حماس د روغتیا وزارت اعلان کړی، چې په تېرو ۲۴ ساعتونو کې د غزې په تړانګه کې د اسراییل په بریدونو کې ۱۰۷ تنه وژل شوي او ۱۴۳ تنه نور ټپیان شوي دي.
په دې توګه په غزه کې د روانې جګړې له پیل راهیسې د وژل شویو فلسطینیانو شمېر ۲۷۵۸۵ ته ورسېد او په دې سیمه کې د نښتو په ترڅ کې ۶۶۹۷۸ کسان ټپیان شوي دي.
د اکټوبر په اوومه د حماس له خوا پر اسراییل تر خونړي برید وروسته اسراییل پر غزې هوايي بریدونه او ځمکني عملیات پیل کړل.
د دغو عملیاتو له امله په سیمه کې پراخې جګړې پیل شوي دي.
ملګرو ملتونو، عربي اتحادیې او ګڼو نړۍوالو سازمانونو په بار - بار په غزه کې د اوربند غوښتنه کړې ده؛ خو د اسراییل لومړي وزیر او نورو چارواکو ویلي؛ تر هغې چې یې د حماس ډله په بشپړه توګه له منځه نه وي وړې تر هغې به جګړه دوام لري.
