د خيبرپښتونخوا په بونیر کې د وسله والو په یوه برید دوو پولیسو ته مرګژوبله اوښتې
پاکستانۍ رسنۍ وايي، تېره شپه د خیبرپښتونخوا په بونیر ضلع کې د پولیسو په چیک پوسټ د برید له امله يو پاکستانی پولیس وژل شوی او یو تن ټپي دی. ويل کیږي، پر دغو پولیسو تېره شپه د (سلواغې ۱۶مه) د بونیر په امبیلا چیک پوسټ برید شوی.
تر اوسه پورې کومې وسله والې ډلې دغه برید نه دی منلی.
په پاکستان کې ټاکنو ته اېله یوه ورځ پاتې ده، ټاکل شوې چې د روانې فبرورۍ میاشتې په اتمه نېټه په دغه هیواد کې ټاکنې ترسره شي.
د ټاکنو مودې له نږدې کېدو سره د پاکستان په دوو ایالتونو خيبرپښتونخوا او بلوچستان کې ناامنۍ زور اخیستی چې له امله یې مرګژولې هم اوښتې دي.
وړمه شپه هم د خیبرپښتونخوا په ډېره اسمعیل خان کې د پولیسو پر یوه مرکز د برید له امله ۱۶ پولیسو ته مرګژوبله اوښتې وه.
تر هغه وړاندې د بلوچستان په بېلابېلو سیمو کې د ډله ییزو، سړک غاړې بمونو او پر امنیتي پوستو د بریدونو راپورونه ورکړل شوي دي.
