د افغانستان کرېکټ بورډ د سریلانکا په وړاندې د درېیو یو ورځنیو سیالیو نوملړ اعلان کړ
د افغانستان کرېکټ بورډ د غوراوي کمېټې تېره ورځ د سریلانکا په وړاندې د درېیو نړیوالو یو ورځنیو سیالیو لپاره پنځلس کسیز نوملړ اعلان کړ او څلور احتیاطي لوبغاړو ته هم پکې ځای ورکړل شوی دی.
د افغانستان کرېکټ بورډ د غوراوي کمېټې د یک شنبې په ماښام د (سلواغې ۱۵مه) د سریلانکا په وړاندې د درېیو نړیوالو یو ورځنیو سیالیو لپاره پنځلس کسیز نوملړ اعلان کړ، په دغه نوملړ کې څلور احتیاطي لوبغاړي هم اخیستل شوي.
د افغانستان کرېکټ بورډ ویلي چې، له سریلانکا سره د پنځوس اوریزو سیالیو لومړۍ لوبه د روانې فبرورۍ میاشتې په نهمه نېټه د کېنډي په پالیکلي کرېکټ لوبغالي کې تر سره شي.
په دغه پنځلس کسیز نوملړ کې حشمت الله شهیدي (لوبډلمشر)، ابراهیم ځدراڼ او رحمان الله ګربز (ویکټ ساتونکی)، رحمت شاه، عظمت الله عمرزی، اکرام عليخېل، محمد نبي، ګلبدین نایب، نوراحمد، مجیب الرحمن، فضل حق فاروقي، نوید ځدراڼ، فرید ملک، ریاض حسن او قیس احمد شامل دي. او د دوی تر څنګشرف الدین اشرف، شاهد کمال، عبدالرحمن او بلال سمیع هم د یاد نوملړ په احتیاطي لوبغاړو کې ځای پر ځای شوي دي.
د افغانستان کرېکټ بورډ اجراییوي مشر نصیب خان د یاد نوملړ په اړه وايي: «زموږ موخه ملي لوبډلو ته د ډېرو سیالیو تنظیمول دي، سږ کال د ټېسټ لوبو ترڅنګ د نړیوالو یو ورځنیو او شل اوریزو سیالیو له اړخه هم بوخت کال لرو، د کرېکټ اسیایي شورا په ناسته کې مو هم د شورا له غړو هېوادونو سره په نورو موضوع ګانو سربېره د لا ډېرو دوه اړخیزو سیالیو پر برابرولو خبرې اترې وکړې.»
یادې درې نړیوالې یو ورځنۍ لوبې به د روانې فبروري میاشتې په نهمه،۱۱مه او ۱۳مه نېټه ترسره شي چې ورپسې به د همدې میاشتې په ۱۷مه، ۱۹ او ۲۱مه نېټه هم درې شل اوریزې نړیوالې لوبې ترسره شي.
