طالبان: د شاتو کوتل لاره د ټرافیکو پر مخ وتړل شوه

په باميان ولايت کې د طالبانو د ټولګټو چارو رياست چارواکي وايي، د شاتو کوتل لاره چې يکاولنګ او پنجاب ولسوالۍ سره نښلوي د واورې د ورېدو او توپان له امله تړل شوې ده.

د دغه ولایت لپاره د طالبانو د ټولګټو چارو رييس حفيظ الله نعمتي ويلي، چې دغه لاره تېر ماښام ۶ بجې تړل شوې او د پاکولو او د بېرته پرانیستلو لپاره یې هلې ځلې روانې دي.

د شاتو کوتل لاره دايکنډي ولايت د پنجاب او ورس ولسواليو له لارې هم له کابل سره نښلوي.
تېره ورځ د طالبانو د هوا پېژندنې ادارې ویلي و، چې د جمعې او شنبې په ورځو د (سلواغې په ۱۳مې او ۱۴مې) د درنې واورې او شړکنده بارانونو اټکل کېږي چې ورسره د سېلابونو د راوتلو وېره هم شته.
د دغې ادارې په خبر پاڼه کې راغلي، چې د باران کچه به له ۱۰ ملي مترو څخه تر ۳۵ ملي مترو وي او د واورې په اړه هم ویل شوي و، چې له ۱۵ څخه تر ۴۵ سانتي پورې به وورېږي.
له بلې خوا په تېرو دوو ورځو کې د سالنګ لویه لار، د غور ولایت د بکک بند کوتل، د میدان ښار ـ بامیان لویه لار د حاجيګک کوتل، د بغلان ولایت د خوست و فرنګ ولسوالۍ لاره او په بدخشان ولایت کې د څلورو ولسوالیو لارې د سختو توپانونو او درنې واورې د ورېدو له امله د موټرو د تګ راتګ له پاره تړل شوې وې.