بشرا بيبي له اډياله زندانه په کور کې د نظر بند په موخه بني ګاله ته ولېږدول شوه
بني ګاله ته د پاکستان د پخواني لومړي وزیر عمران خان مېرمن بشرا بيبي د لېږلو پرېکړه د امنیتي لاملونو له کبله شوې ده. محکمې تېره ورځ عمران خان او بشرا بيبي ته د توشه خانې یا د دولتي ډالیو د پلورلو په قضیه کې د ۱۴ کاله بند او ۷۸۷ مېلیونه پاکستاني روپیو جریمې سزا واوروله.
د دې ترڅنګ دواړه تر راتلونکو لسو کلونو له سیاسي څوکیو هم بې برخې ګرځول شوي دي.
بشرا بيبي د ۱۴ کلونو بند سزا تر اورېدو وروسته په خپله خوښه یې د راولپنډۍ اډیاله زندان کې د احتساب محکمې ته ځان وسپاره.
بشرا بيبي د اډیاله زندان په غوښتنه د عمران خان استوګنځي بني ګاله ته لېږدول شوې ده.
د ځینو رسنیزو سرچينو په خبره، د اسلام اباد پوليس له بني ګاله بهر د هغې د ساتلو دنده پر غاړه لري.
بلخوا د وروستيو امنيتي اندېښنو له کبله د پوليسو لهخوا د اډياله زندان په شاوخوا کې کوټلي امنيتي ګامونه اخیستل شوي او د زندان په شاوخوا کې اضافي امنیتي ځواکونه هم ځای پر ځای شوي دي.
