امریکا په ترکیه او لبنان کې پر یوه شخص او درېیو بنسټونو بندیزونه ولګول

د امریکا د متحده ایالاتو د خزانې وزارت په ترکیه او لبنان کې پر یو کس او درېیو بنسټونو د سپاه پاسداران قدس ځواک او حزب الله سره د مالي تمویل په تور بندیزونه لګولي دي.

د امریکا د خزانې وزارت په یوه تازه بیان کې اعلان کړی، چې دغو بنسټونو د سوریې د حکومت په ګډون پر بېلابېلو خواو د ایراني توکو له خرڅلاو څخه سلګونه میلیونه ډالر ترلاسه کړي دي.

د دغه وزارت په وینا؛ د دغو راکړو - ورکړو ګټه د قدس ځواک او د لبنان د حزب الله په تمویل کې کارول شوې ده.

په ورته وخت کې د امریکا د خزانې وزارت یوه چارواکي رویټرز او سي این این ته د نوم د نه ښودلو په شرط ویلي، چې د ایران په ملاتړ وسلوالې ډلې د خپلو بریدونو د تمویل لپاره د عراق له مالي سیستم څخه کار اخلي.

دغه چارواکي ويلي، چې دوی په حساسو شرایطو کې دي او له معلوماتو وروسته به د دې وسلوالو ډلو د مالي مسالو په باب پرېکړه کوي.