د پاکستان په بلوچستان ایالت کې پر یو زندان او دولتي ودانیو بریدونه شوي
د پاکستاني رسنیو د رپوټونو له مخې؛ وسله والو د بلوچستان په کاچي سیمه کې د مچ پر زندان او حکومتي ودانیو بریدونه کړی.
په دغو رپوټونو کې راغلي چې بریدګرو څو راکټونه پر بیلابیلو موخو ویشتلي او په رامنځ ته شوو چاودونو کې ځینې کورونه او ودانۍ زیانمنې شوي دي. د بریدګر او پاکستاني امنیتي ځواکونو ترمنځ سختې نښتې شوي او د ښار له ټولو برخو پولیس دغې سیمې ته وربلل شوي دي.
په همدې حال کې د بلوچستان ایالت د اطلاعاتو وزیر جان اچکزی ویلي، چې امنیتي ځواکونو په مچ سیمه کې د اسلم اچو ډلې سره د تړلو جنګیالیو لخوا ترسره شوي درې همغږي بریدونه په شا تمبولي دي. د نوموړي په وینا په دې بریدونو کې د پاکستان امنیتي ځواکونو ته کوم زیان نه دی اوښتی او نه هم تاسیسات زیانمن شوي دي.
ښاغلي اچکزي ټینګار کړی چې اوس بریدګر له سیمې په شا شوي او امنیتي ځواکونه د هغوی په تعقیب کې دي. هغه ویلي:"موږ هیله مند یو چې ټول ګواښونه به له سهار مخکې له منځه یوړل شي.”
پاکستاني رسنیو ویلي چې دغه برید د بلوچ د خپلواکۍ غوځنګ له خوا ترسره شوی دی. د برید د مرګژوبلې په اړه لا معلومات ندی ترلاسه شوی.
