د هوا پېژندنې اداره: د افغانستان په ۱۱ ولایتونو کې د واورو، اورښتونو او سیلابونو اټکل شوی
د سلواغې نهمه او لسمه د سالنګونو په ګډون د هېواد په یوولسو شمالي او ختیځو ولایتونو کې د واورې ورېدو، تېز اورښت او سیلابونو د پېښېدو اټکل شوی دی.
د ټرانسپورټ او هوايي چلند وزارت د هوا پېژندنې ریاست پر اېکس پاڼه لیکلي، چې د هېواد په شمالي ولایتونو بدخشان، تخار، کندز، پروان، بغلان، پنجشیر، کاپيسا او ختیځو ولایتونو نورستان او لغمان ولایتونو کې د درنې واورې او شدیدو اورښتونو اټکل شوی دی.
د طالبانو تر واک لاندې باختر خبري اژانس بیا نن له سهار راهیسې د فیض اباد ـ کشم لاره چې تخار له بدخشان سره نښلوي، د اورښتونو او په درېیو ځایونو کې د سړک د ویجاړېدو له امله د لارې د تړل کېدو خبر ورکوي.
د ځايي مسوولانو په خبره، د لارې د پرانېستلو لپاره هڅې پیل شوي دي.
دا په داسې حال کې ده، چې له تېرو څو کلونو راهیسې د هېواد ډېری برخې وچکالۍ ځپلي دي او یو شمېر هېوادوال د واورې او باران اورېدل د کرنیزو محصولاتو د زیاتېدو لپاره ګټور ګڼي او په دې باور دي، چې اورښتونه به هېواد له وچکالۍ څخه خلاص کړي.
تېره ورځ د کابل په ګډون د هېواد په یو شمېر ولایتونو کې د سږکال لومړۍ واوره وشوه.
له یوې خوا ځیني هېوادوال او باغ لرونکي ورته خوشاله دي او له بلې خوا بیا هغه کورنۍ چې له ناوړه اقتصادي ستونزو سره مخ دي د سون توکو له لوړو بیو شکایت کوي.
د یادولو ده، چې مرستندویه نړۍوالو ادارو بیا سږکال ژمی په افغانستان کې د انساني ناورین خبرداری ورکړی.
