ماهرنګ بلوڅ: موږ له لومړۍ ورځې په دې پوهېدو، چې له اسلام اباده به انصاف ترلاسه نه کړو
په اسلام اباد کې د یوې میاشتې احتجاجي ناستې وروسته د ماهرنګ بلوڅ په مشرۍ د تربت لانګ مارچ ګډونوال د پنجشنبې په ورځ کویټې ته ورسېدل. د بلوچستان پوهنتون ته څېرمه په سریاب سیمه کې د زدهکړیالانو او ښځو په ګډون زرګونو کسانو د لاریون کوونکو تود هرکلی وکړ.
ماهرنګ بلوڅ وایي:« په اسلام اباد کې پوليسو زموږ د ښځو له سرونو څخه پړوني کش کړل او هم يې وربړوولې.»
هغې زياته کړه، چې بلوڅ ملت بايد هيڅکله دغه ناوړه عمل هېر نه کړي او نه هم بايد خپل ورک شوي وروڼه هېر کړي.
هغه وایي:« موږ له لومړۍ ورځې په دې پوهېدو، چې له اسلام اباده به انصاف ترلاسه نه کړو. موږ له اسلام اباده پخوا هم کومه تمه نه درلوده او نه به یې په راتلونکې کې ولرو.»
هغې وويل:« که بلوڅان نن له خوبه راپانه څېږي، سبا به يې حالت له بنګاليانو بدتر وي.»
هغې له خلکو وغوښتل، چې د جنورۍ په ۲۷مه په کویټه کې په ټاکل شوې غونډه کې ګډون وکړي او ټینګار یې وکړ، چې د بلوڅ یکجهتي کمیټه به د دغې غونډې په لړ کې د خپل راتلونکو ګامونو په اړه مالومات ورکړي.
د ماهرنګ بلوڅ په مشرۍ یکجهتي کمیټې د سه شنبې په ورځ اعلان وکړ، چې د پولیسو او نورو دولتي ادارو فشارونو او د حکومتي چارواکو بې غورۍ دوی دې ته اړ کړي چې په اسلام اباد کې لاریون پای ته ورسوي.
هغې زیاته کړه، چې له دې احتجاج وروسته پیاوړې شوې او خپل حرکت ته به دوام ورکړي.
سربېره پر دې، د بخښنې نړیوال سازمان په اسلام اباد کې د بلوڅ مظاهره کوونکو ځورونه غندلې ده.
له بل پلوه بیا د بلوچستان د اطلاعاتو لنډمهاله وزیر جان اڅکزي ادعا وکړه، چې د بښنې نړۍوال سازمان "نا تصدیق شوې ادعاوې، معتصبې سرچینې او په ښکاره ډول پر غلطو بیاناتو" تکیه کوي، چې د بېلتون غوښتونکو عناصرو لهخوا د شخصي ګټو سره رامنځته شوي.
