ټيټيپي: موږ په پاکستان کې د راتلونکو ټاکنو پر غونډو او کمپاینونو بریدونه نه کوو
ټيټيپي ویلي، چې دوی په پاکستان کې پر ټاکنیزو غونډو او انتخاباتي کمپاینونو له بریدونو ډډه کوي. اسوشیتید پرېس رپوټ ورکړی چې دغې ډلې ورته ویلي، د دوی موخه په پاکستان کې پوځي او امنیتي ادارې او مرکزونه دي او دوی هغو ګوندونو سره کار نه لري، چې په ټاکنو کې برخه اخلي.
خو په پاکستان په تېر ځل ټاکنو کې د عوامي نشنل ګوند ګڼ کسان په نښه شوي وو، چې د هغوی د ډېرو وژل شویو کسانو پړه ټيټيي ډلې منلې وه؛ خو دا پلا یې د اوسنۍ ژمنې سره، سره په خیبر پښتونخوا او بلوچستان صوبو کې انتخاباتي هلې ځلې د پخوا پرتله پېکه شوې او داسې برېښي، چې خلک د همدغې ډلې د بریدونو له امله په وېره کې دي.
تر دې وړاندې د پاکستان پوځ او نورو امنیتي ادارو د دغو ټاکنو له پاره بشپړ چمتوالی نیولی او تېره ورځ هم حکومت ویلي وو، چې د پوځ او ولسي ځواکونو په لیکو کې به د ټاکنو د خوندي تابه له پاره نوي ځواکونه ګوماري او دغه لیکې به تر پخوا ډېرې پیاوړې کړي.
دا رنګه څو ورځې وړاندې په خیبر پشتونخوا، بلوچستان او د سند صوبو په ځینو اړونده سیمو کې داسې شپې پاڼې هم خپرې شوې وې او له ولسي خلکو غوښتل شوي وو، چې په ټاکنو کې دې برخه نه اخلي.
