د پاکستان لوی درستیز: د یوه پاکستاني ژوند تر ټول افغانستان مهم دی

د پاکستان لوی درستیز په یوه بیانیه کې د ګاونډیو هیوادونو پر وړاندې د پاکستان د بهرني سیاست د لومړیتوب په اړه وویل، چې د یوه پاکستاني ژوند تر ټول افغانستان مهم دی. د اکسپرېس ټریبیون د راپور له مخې، عاصم منیر طالبانو ته خبرداری ورکړ، چې «مونږ چمتو یو هر څه قرباني کړو.»

نوموړي د چهارشنبې په ورځ وویل، کله چې د یوه پاکستاني وګړي بحث رامنځته کیږي، نو د اړتیا په صورت کې ټول افغانستان له منځه وړلی شي.
د دغه راپور له مخې، د پاکستان لوی درستیز له پاکستاني زدکړیانو سره په لیدنه کې ادعا وکړه چې پاکستان پنځوس کاله پنځه میلیونه افغانانو ته ډوډۍ ورکړې ده.
نوموړي همداراز وویل، د پاکستان پوځ به هغه کسان وڅاري چې ددغه هیواد په وګړو برید کوي.
دغه جګپوړي پاکستاني پوځي چارواکي ادعا کړې، چې "په بلوچستان کې تاوتریخوالی ډېری وخت د افغانستان له خوا ملاتړ کېږي او لوېديځ ګاونډي هېڅکله د پاکستان پر وړاندې دوستي نه ده ښودلې.
د دغه راپور له مخې، جنرال عاصم منیر زیاته کړه، افغانستان یوازینی هېواد و چې له هند څخه د دغه هېواد له خپلواکۍ وروسته یې په ملګرو ملتونو کې د پاکستان له منلو سره مخالفت وکړ.

هغه وويل: "ستونزه دا ده چې خلک تاريخ نه لولي.
د پاکستان د پوځ د لوی درستیز وروستۍ څرګندونې له طالبانو سره د پاکستاني چارواکو په لوړه کچه نارضایتي ښيي.
په وروستیو میاشتو کې د طالبانو او اسلام اباد ترمنځ اړیکې په پاکستان کې د ناامنب د زیاتوالي له امله خرابې شوې دي.
رسمي شمېرې ښيي چې په افغانستان کې د طالبانو له واکمنۍ وروسته په پاکستان کې د ناامنیو کچه ډېره شوې ده.
پاکستاني چارواکو پر طالبانو تور لګولی چې د طالبانو ضد وسله والو لکه ټي، پي، پي ته پناه ځایونه او اسانتیاوې ورکوي.
دغو چارواکو ان په تیرو دوو کلونو کې د پاکستاني امنیتي ځواکونو پر ضد په ځینو خونړیو بریدونو کې افغان طالبان هم په لاس لرلو تورن کړي دي.
خو د طالبانو ویاندویان په پرله پسې ډول دغه تورونه رد کړي او ویلي یې دي چې اسلام اباد د امنیت په برابرولو کې د خپلې ناکامۍ پړه پر طالبانو اچوي.