چین له ازبکستان سره په نږدې اړیکو د روسیې د اوبو پر ځای په وچه تر اروپا ځان رسول غواړي
چین د منځنۍ اسیا د پټلۍ په ګډون ازبکستان ته ځینو پروژو کې د نېږدې همکارۍ په وړاندیز له دغه هېواد سره خپل ډېپلوماټیک اړیکي نور هم زیات کړل. چین د پټلۍ دې پروژې سره نوې سوداګريزه لار جوړول غواړي؛ ځکه د روسیې له لارې سمندري لار ورته اوږده او ګرانه تمامېږي.
د چین شین هوا خبري اژانس وايي؛ د دغه هېواد ولسمشر شي جن پینګ نن په بېجینګ کې له ازبک سیال شوکت میرضیایف سره لیدنه کې خپلمنځي اړیکي له «ټولیز ستراتیژیک مشارکت څخه پر هر اړخیز ستراتېژیک مشارکت بدل کړل.»
بېجینګ له تاشکند سره د اړیکو د نوي څپرکي په پرانیستلو سره غواړي، چې د چین- قرغزستان او ازبکستان پتلۍ د جوړولو کار ژر تر ژره پیل شي.
پر دې پروژه په ۱۹۹۰ کلونو کې خبرې شوې وې؛ خو تازه یې هغه وخت اهمیت پېدا کړ، چې پر اوکرین په یرغل پسې په مسکو بندیزونه ولګېدل او له امله یې د چین او اروپا ترمنځ د روسیې له لارې پر ځمکنۍ لار د توکو لېږل بند شول.
د نوې لارې جوړېدو سره به د چین او اروپا تر منځ د توکو رسېدو وخت هم خورا کم شي.
چین د نړۍ مختلفو بازارونو ته د رسېدو لپاره د ورېښمو لار هم غځوي او په مقابل کې ازبکستان هم تر سوېلي اسیا د ځان رسولو لپاره د افغانستان له لارې تر پاکستان پټلۍ غځول غواړي.
تېره پنجشنبه د دې پټلۍ تړون په اسلام اباد کې لاسلیک شو او تازه د پاکستان او ازبکستان چارواکو پرون هم په دې تړاو خبرې کړې دي.
