د طالبانو د کډوالو وزارت: له ایران او پاکستانه تر ۱۵۰۰ډېر افغان کډوال هېواد ته راستانه شول

د طالبانو د کډوالو او راستنېدونکو چارو وزارت ویلي، چې له پاکستان او ایرانه په راستنو شویو افغان کډوالو کې د بې سرپرسته ماشومانو تر څنګ هغه بندیان هم شامل دي چې، د پاکستان په بېلابېلو ښارونو کې بندیان وو.

د طالبانو د کدوالو چارو وزارت د چهار شنبې په ورځ د (سلواغې ۴مه) پر خپلې اېکس پاڼې لیکلي، چې د سه شنبې په ورځ له ایرانه ۱۲۰۱ تنه افغان کډوال په خپله خوښه او جبري ډول د اسلام کلا له لارې هېواد ته راستانه شوي.

دغه وزارت ویلي، د راستنو شویو کسانو له ډلې څخه ۵۵۱ تنه اړمن کسان د مرستو د تر لاسه کولو په موخه د ملګرو ملتونو د کډوالۍ نړۍوال دفتر ته ورپېژندل شوي او همدارنګه د یاد وزارت له لوري د ۵۱ کورنیو سره نغدي مرستې هم شوې دي.
د طالبانو د کډوالو چارو وزارت وايي، له ایرانه په جبري اېستل شویو کډوالو کې ۵۳ بې سرپرسته ماشومان هم شامل وو او په هرات ولایت کې د وار چایلډ موسسې ته سپارل شوي.

همدارنګه د کډوالو وزارت وايي، د سه شنبې په ورځ د سپین بولدک او تورخم له لارو ۳۰۱ تنه افغان کډوال په جبري ډول له پاکستانه هېواد ته راستانه شوي.
دغه وزارت د سپین بولدک د سرحدي امریت د راپور له مخې ویلي، چې په راستنو شویو کسانو کې ۵۷ تنه هغه زندانیان هم شامل وو چې د پاکستان په بېلا بېلو زندانونو کې بندیان وو.

په دې ورستیو کې له پاکستانه په جبري ډول د افغان کډوالو د ستنېدو شمېر کم شوی؛ خو په تېرو دوو ورځو کې له ایرانه تر دوه زرو ډېر افغان کډوال په جبري ډول او خپله خوښه هېواد ته ستانه شوي.