د پاکستان د اطلاعاتو وزیر: د قاضیانو پر ضد د ناوړه کمپاین په اړه مو څېړنې پیل کړي
د پاکستان د اطلاعاتو سرپرست وزیر مرتضی سولنګي وايي، چې د سترې محکمې د قاضیانو پر وړاندې د وروستیو ناوړه کمپاینونو پر وړاندې به له قانون سره سم چلند وشي.
نوموړي د دوشنبې په ورځ په اسلام اباد کې د پاکستان د مخابراتو او فیډرالي تحقیقاتي ادارې له چارواکو سره په یوه ګډه خبري غونډه کې ویلي، چې د کورنیو چارو وزارت د روانې عیسوي میاشتې په ۱۶مه نېټه د دې موضوع د څېړلو لپاره د یوې ګډې کمېټې د جوړېدو خبر ورکړی و.
سولنګي ویلي، چې د پاکستان د مخابراتو، فیډرالي تحقیقاتي او نورې اړوندې ادارې خپلې پلټنې کوي او په دې لړ كې یې د خواله رسنیو په بیلابیلو کاروونکو څارنه کوي.
نوموړي په پاکستان کې دننه او د هغه هېواده بهر میشتو عناصرو ته خبرداری ورکړی، چې د سترې محکمې د قاضیانو پر وړاندې له ناوړه کمپاینونو دې لاس واخلي.
د پاکستان د مخابراتو د ادارې عمومي مشر،احمد شمیم پیرزاده بیا وايي، چې دوی دا واک لري چې د خواله رسنیو هغه پیغامونه چې قاضیانو ته پکې سپکاوی کیږي، بند کړي او یا یې لرې کړي.
د پاکستان د فيډرالي تحقیقاتي ادارې د عملیاتو مشر وقارالدین سید هم ویلي، چې دوی هغه کسان تشخیص کړي چې دغه کمپاینونه کوي او د هغوی پر وړاندې به سمدستي اقدام وکړي.
نوموړي چې دوی د سترې محکمې د قاضیانو په وړاندې په وروستي کمپاین کې ښکیل د خواله رسنیو حسابونه تعقیبوي او هیچا ته به اجازه ورنه کړي، چې د دولتي ادارو د چارواکو شهرت ته زیان ورسوي.
