پاکستانی چارواکی: 'ترهګرو' ته په پناه ورکولو سره د طالبانو او د اسلام اباد اړیکې خرابیږي
د پاکستان د اطلاعاتو وزیر وویل له طالبانو سره د اسلام آباد اړیکې د دغې ډلې په کړنو پورې اړه لري. د پاکستاني رسنیو د راپور له مخې مرتضی سولنګي ویلي، که طالبان «د پاکستاني طالبانو په ګډون ترهګرو ته پناه ورکولو ته دوام ورکړي، زه ویره لرم چې د دغو اړیکو راتلونکی به خراب شي.»
په دغه هیواد کې د وسله والو ډلو په ځانګړې توګه د پاکستاني طالبانو له خوا د ناامنیو او تاوتریخوالي له زیاتېدو وروسته، پاکستان په کابل کې طالبان، ټي ټي پي ته په پټنځایونو ورکولو تورن کړل او له دغې ډلې یې د تحریک طالبان پاکستان پر ضد د جدي اقدام غوښتنه وکړه.
پاکستاني چارواکو په وار وار ویلي چې تحریک طالبان پاکستان د طالبانو تر ولکې لاندې افغانستان کې پناه اخیستې او هلته روزل کیږي بیا د پاکستان په خاوره کې «ترهګریز» فعالیتونه کوي.
په کابل کې طالبانو د پاکستان دا ادعا تل رد کړې او ویلي یې دي چې اسلام اباد د خپل امنیت د نه خوندیتوب له امله «خپلې ستونزې د افغانانو پر اوږو اچوي.»
تر دې مخکې پاکستاني طالبانو په ۲۰۲۳ کال کې د خپلو فعالیتونو راپور خپور کړی و او ویلي یې وو چې په ټول پاکستان کې یې ۸۸۱ بریدونه کړي او تر دوو زرو زیات پاکستاني پوځیان یې وژلي دي.
