پاکستان پرېکړه کړې، چې له ایران سره د امنیتي لانجو د حل لپاره له ارتباطي چېنلونو کار واخلي
د پاکستان د لنډمهاله لومړي وزیر له دفتره په خپرې شوې خبرپاڼه کې راغلي، چې تېره ورځ د جنورۍ ۱۹مه د ملي امنیت کمیټې غونډه د لنډمهاله لومړي وزیر انوار الحق کاکړ په مشرۍ جوړه شوه چې د ملي امنیت په مسلو غور وکړي.
خبرپاڼه کې راغلي، چې غونډې پر شته حالاتو ژوره کتنه وکړه او د پاکستان د خپلواکۍ د ناقانونه سرغړونې پر وړاندې د پاکستان د وسلهوالو ځواکونو له د مسلکي، منظم او متناسب غبرګون ستاینه وکړه.
د غونډې پرمهال د پاكستان او ايران ترمنځ د روان وضعیت او په سيمه كې په عمومي سلامتيا او د هغې د اغېزو په اړه د سياسي او سفارتي پرمختګونو په اړه مالومات ورکړل شول.
خبرپاڼه کې راغلي، چې د پولو په اوږدو کې د وضعیت په اړه تازه معلومات او د ملي حاکمیت څخه د بلې سرغړونې په اړه هر اړخیز ځواب ویلو لپاره پر اړین او بشپړ چمتوالي هم بحث وشو.
دوی څرګنده کړه، چې ایران یو ګاونډی او ورور مسلمان هېواد دی او د سیمې د سولې او ټیکاو د لویو ګټو لپاره د یو بل د امنیتي اندېښنو د حل کولو لپاره باید د دواړو هېوادونو تر منځ له شته څو ارتباطي چینلونو څخه په دوه اړخیزه توګه ګټه واخیستل شي.
غونډې د ملګرو ملتونو د منشور او نړۍوالو معیارونو سره سم د ټولو هېوادونو د حاکمیت او ځمکنۍ سلامتیا لپاره د پاکستان پر ژمنې ټینګار وکړ.
په دې غونډه کې د ملي دفاع، بهرنیو چارو، مالیې او اطلاعاتو لنډمهاله وزیرانو، د ګډو ځواکونو د لوی درستیزانو د کمېټې مشر، د پوځ لوی درستیز، د سمندري او هوايي ځواکونو مشر او همدارنګه د استخباراتي ادارو مشرانو هم ګډون کړی و.
