د پاکستان د ملي امنیت کمېټه وایي له ایران سره جنجال نه غواړي
د پاکستان د ملي امنیت کمېټه وايي، له ایران سره جنجال نه غواړي، خو پر خپله ځمکنۍ بشپړتیا هم سودا نه کوي. د ایران او پاکستان ترمنځ له خپلمنځي توغندیز برید وروسته نن دا غونډه د لومړي وزیر انوارالحق کاکړ په مشرۍ جوړه شوې وه.
تر دې غونډې مخکې د پاکستان بهرنیو چارو وزیر له ایراني سیال سره خبرو کې ویلي چې د خپلمنځي ستونزو د حل لپاره همکارۍ ته تیار دي.
سرچینو جیو نیوز ته ویلي چې د ملي امنیت شورا غونډه کې هم د پاکستان بهرنیو چارو وزیر په ډیپلوماټیکه او دفاع وزیر په خپله برخه کې مالومات ور کړل.
تر دوو ساعتونو اوږده غونډه کې د پاکستان پوځي مشرانو دا هم وویل، چې ایران کې یې پرون د استخباراتي مالوماتو له مخې عملیات کړي دي.
تر دې غونډې وروسته د پاکستان کابینې هم په غونډه کې ویلي چې ایران د اوسني کړکېچ د ختمولو هیله لري او دوی هم ور سره جنجال ختمول غواړي.
د پاکستان بهرنیو چارو وزیر د ملي امنیت شورا غونډه کې، ایراني سیال ورته ویلي چې د کړکېچ ختمول غواړي.
د نوموړي تر څرګندونو وروسته کابینې پرېکړه کړې چې له ایران سره ډیپلوماټیک اړیکي عادی کړی.
پاکستان وايي د ایران د سیستان بلوچستان په سراوان کې یې د بلوڅ بېلتونپالو پر مرکزونو بردی کړی دی.
خو د ایران چارواکي وایي، په دې برید کې ولسي وګړي وژل شوي دی.
د پاکستان دا برید د دغه هېواد په بلوچستان کې د ایران توغندیز برید ته ځواب و.
ایران وايي، په دغه برید کې یې جیش العدل ډلې دوه مرکزونه له منځه وړي، خو پاکستان وايي، په برید کې دوه ماشومان وژل شوي دي.
