د افغانستان له لارې د ازبکستان او پاکستان د نښلوونکې پټلۍ تړون لاسلیک شو
د پاکستان پټلۍ وزارت وايي؛ د افغانستان له لارۍ له ازبکستان سره پر پټلۍ د دغه هېواد د نښلولو لپاره درې اړخیز تړون نن په اسلام اباد کې لاسلیک شو. دا وزارت خپل اېکس کې زیاتوي، چې دا پټلۍ له ترمز د افغانستان بلخ ته ننوځي او بیا د لوګر له لارې په خرلڅیو پاکستان ته اوړي.
د دې تړون د لاسلیکولو په مراسمو کې د پاکستان د پټلۍ وزیر سعد رفیق او د مالیې وزیر اسحاق ډار ګډون درلود.
دا وزارت په خپله اعلامیه کې زیاتوي، چې د ازبکستان او افغانستان په استازۍ د دغه هېواد سفیرانو او د درې واړو هېوادونو نورو چارواکو ګډون کړی و.
پاکستاني چارواکي وايي؛ دا پټلۍ به د سیمې په اقتصاد او تجارت پرمختګ کې مهم رول ولوبوي.
په افغانستان کې د جمهوریت له پرځېدو وروسته هم ازبکستان د منځنۍ اسیا تر نورو هېوادونو له طالبانو سره پراخ اقتصادي اړیکي ساتلي دي.
دا هېواد له سوېلي اسیا سره د نښلېدو لپاره افغانستان ته د پل په سترګه ګوري.
د ازبکستان ولسمشر تېر دوبی هم سوېلي اسیا ته د رسېدو لپاره افغاناستان خوندي دهلېز وباله او زیاته یې کړه، چې د پټلۍ له لارې به دغه هدف ته ورسېږي.
