طالبان: ترکیه پر خپله خاوره کې د طالبانو ضد سیاسي او نظامي فعالیت اجازه نه ورکوي
د طالبانو تر کنټرول لاندې ارګ په یوې خبرپاڼې کې لیکلي، په کابل کې د ترکیې سفیر د دې ډلې د رییس الوزرا له سیاسي مرستیال سره په لیدنه کې ویلي، چې هېواد به یې هېچا ته اجازه ورنه کړي چې په ترکیه کې د طالبانو پر ضد سیاسي او پوځي فعالیت وکړي.
په کابل کې د ترکیې سفارت بیا د دې لیدنې په اړه څه نه دي ویلي.
په ۱۴۰۰ کال کې پر افغانستان د طالبانو له بیا واکمنۍ وروسته د پخواني دولت زیات شمېر چارواکي او د طالبانو د مخالفو ګوندونو مشران ترکیې ته ولاړل.
د روان کال وږي په میاشت کې د ترکیې حکومت د « کارنده سیاسي نظام او افغانستان کې تل پاتې سوله» تر سرلیک لاندې د پخوانیو افغان چارواکو غونډه لغوه کړه.
مولوي عبدالکبير له جنګ اونا سره کتنه کې د دغې ډلې مخالفینو ته د اجازې نه ورکولو له امله له ترکیې مننه کړې. د طالبانو د خبرپاڼې له مخې؛ ښاغلي عبدالکبیر ویلی، چې په افغانستان کې د ټولو افغانانو لپاره د ګډ او سوله ییز ژوند زمینه برابره شوې ده.
په دې کتنه کې د ترکیې سفیر ویلي؛ هېواد یې له افغانستان سره د پوهنې او لوړو زده کړو په برخو کې همکاري کوي.
د طالبانو د خبرپاڼې له مخې؛ د ترکیې سفیر ویلي، چې ترکیي سوداګر چمتو دي چې افغانستان کې د کانونو، برېښنا او کرنې په برخو کې پانګونه وکړي.
ترکیه له طالبانو سره نږدې اړیکې لري. دغه هېواد یو شمیر طالب ډېپلماټان هم منلي دي.
