سرچینې: طالبانو په خوست کې د 'نن' په نوم یوه راډيو تر پلټونو وروسته وتړله
ځايي سرچینې وايي؛ په خوست کې طالبانو نن سې شنبه (د مرغومي ۲۶مه) د «نن» په نوم په یوې سیمه ییزې راډيو چاپه وهلې، کارکوونکي یې په مرګ ګواښلي او تخنيکي وسايل يې ورمات کړي دي. سرچینې زیاتوي، چې طالبانو پر دغې راډيو د چاپې پر مهال د راډیو ژوندۍ خپرونې پرې کړې او راډیو یې تړلې.
په افغانستان کې د طالبانو تر څه باندې دوه کلن واک وروسته د بيان ازادۍ ورځ تر بلې محدوديږي.
افغانستان انټرنشنل – پښتو څانګې ته د خوست ولایت د نن راډيو هغه انځورونه هم رسېدلي، چې طالبان له وسلو سره د راډيو په ودانۍ کې ولاړ او تخنيکي وسايل يې ټول بهر غورځولي دي.
د دغې راډيو مسوول محمد اسلم قانوني افغانستان انټرنشنل – پښتو ته وويل، چې دغه راډیو یې په یوه کرايي کور جوړه کړې وه او له تېرو څو مياشتو راهيسي يې د کور د دویم دعوه کوونکي سره ستونزه جوړه شوې.
قانوني وايي، چې د دعوې دوسيه يې په محکمه کې ده؛ خو د طالبانو د امنيه قوماندانۍ مسوولانو د شخصي اړيکو له لارې راډيو په ناقانونه ډول ور بنده کړه.
هغه وویل: «د کور اصلي خاوند په بهر کې دی، پنځه مياشتې کېږي چې بل کس دعوه پر کړې وه، دغه قوماندان، چې راغلی نن یې کسان را وليږل او کور یې تخليه کړ، دغه کار یې غيرې قانوني او غیرې شرعي راسره وکړ،په داسې حال کې چې دوسيه په محکمه کې ده.»
د نن ايف ايم راډيو کار کوونکي وايي، چې طالبانو د وسلو په زور د دوی ژوندۍ خپرونه پرې کړه او وروسته یې د امنیتي کمرو هارډيسکونه او نور وسايل هم د ځان سره یووړل.
دوی وايي: «طالبانو د راډيو يو شمېر کار کوونکي په مرګ هم وګواښل.»
د افغانستان د خبریالانو مرکز (اې ایف جي سي) په خوست کې د نن راډیو د تړلو په غبرګون کې د خوست ولايت په چارواکو غږ کړی، چې هر څومره ژر چې کیږي دغې راډیو ته د خپرونو زمینه برابره کړي.
دغه مرکز په يوه خبرپاڼه کې پر طالبانو د رسنیو د قانون د پلي کېدو غږ کړی او ويلي یې دي، چې د رسنیو د قانون څلورمې مادې پر بنسټ، «هېڅ حکمي شخص د بیان ازادۍ د مخنیوي، سانسور، او بندیز حق نه لري،»
بل لور بيا تېره ورځ په لوګر کې د عینک په نوم د یوې نوې راډيو پرانيستې ته د دې ډلې وياند ذبیح الله مجاهد هم ورغلی و.
د رسنيو ډېری مسوولان په دې باور دي، چې واکمنه ډله هغو رسنيو ته د فعاليت اجازه ورکوي، چې د دوی په ګټه خپرونې کوي.
د خوست ولایت لپاره د طالبانو امنيه قوماندانۍ رسنیز دفتر په يوه خبرپاڼه کې ويلي، چې دغه کار یې د محکمې د امر له مخې کړی.
اعلامیه زیاتوي:«د راډيو او د کور د خاوند تر منځ حقوقي دعوې په محکمه کې جريان درلود او نن غرمه مو د ابتدايي محکمې په امر کور تخيله کړ.»
شنوونکي وايي، چې واک ته د طالبانو تر رسېدو وروسته له رسنيو او خبريالانو سره د دغې ډلې ناسم چلند لوړې کچې ته رسېدلی او یو زيات شمېر رسنۍ د اقتصادي ستونزو ترڅنګ له امنيتي ننګونو سره هم مخ دي او ورځ تر بلې په افغانستان کې د بيان ازادۍ له نویو ننګونو سره مخ کیږي.
