د طالبانو د کډوالو او بېرته ستنېدونکو چارو وزارت په اېکس پاڼه لیکلي، چې ۳۳۳ افغان کډوال د مرغومي په ۲۴مه د سپین بولدک او تورخم له لارې په جبري توګه هېواد ته ستانه کړای شوي دي.
د ننګرهار ولایت د تورخم د سرحدي امریت د مالوماتو پر بنسټ، ۳۷ کورنۍ چې ټولټال ۱۷۵ تنه کېږي په جبري توګه له پاکستانه هېواد ته ستانه کړای شوي دي.
د دوی په وینا، دغه کډوال تر ثبتېدو وروسته د مرستو ترلاسه کولو په موخه د ملګرو ملتونو عالي کمېشنرۍ او د کډوالۍ نړۍوال سازمان ته ورپېژندل شوي دي.
له بلې خوا د کندهار ولایت د سپین بولدک د سرحدي امریت د مالوماتو پر بنسټ، ۳۲ کورنۍ چې ټولټال ۱۵۸ تنه کېږي او درې تنه یې تازه له بنده خوشې شوي په جبري توګه هېواد ته ستنې کړای شوې دي.
د دوی په وینا، دغه کډوال تر ثبتېدو وروسته د مرستو ترلاسه کولو په موخه د ملګرو ملتونو عالي کمېشنرۍ، د خوړو نړۍوال سازمان او د کډوالۍ نړۍوالې ادارې ته ورپېژندل شوي دي.
افغانستان ته له پاکستانه د جمعیت العلمای اسلام ګوند د مشر مولانا فضل الرحمان په مشرۍ تللي پلاوي ویلي و، چې د افغان کډوالو د اېستلو په برخه کې د پاکستان حکومت وروستۍ پرېکړه سمه نه وه او په دې سره د افغان کډوالو ټول بشري حقونه له پامه غورځول شوي دي.
دغه پلاوي ویلي، چې په دې اړه هغوی پخوا هم د اعتراض غږ اوچت کړی او تر دې وروسته به هم د پاکستان له حکومت سره خبرې کوي، چې د دغو کډوالو په اېستلو کې له زغمه کار واخلي.
له بلې خوا پاکستاني چارواکي وایي، چې د بې اسناده بهرنیانو د اېستلو لړۍ لاهم په منظمه توګه روانه ده.