د تورخم دروازه د درې ورځو په تېرېدو لا هم د بار وړونکو موټرو د چلوونکو په مخ تړلې ده
نن درېیمه ورځ ده چې پر ډیورنډ فرضي کرښه د تورخم دروازه د هغو بار وړونکو موټرو د بې ویزې چلوونکو پر مخ تړلې، چې له افغانستانه پاکستان ته او له پاکستانه افغانستان ته لویې لارۍ او ټیلر ګاډي چلوي. طالبانو او پاکستان دوه ورځې مخکې پر تورخم د بار وړونکو موټرو پر تګ راتګ بندیز لګولی.
افغانستان انټرنشنل پښتو څانګې ته په اسلام اباد کې يوه پاکستاني چارواکي د نوم نه ښودلو په شرط ویلي چې دغه لاره په تېرو دوو ورځو کې د اړوند چارواکو له دوه ځلې خبرو اترو وروسته هم تړلې پاتې ده.
سرچینه زیاتوي ښايي دغه لاره دا ځل په ځنډ سره پرانیستل شي: «موږ خو کوششونه جاري ساتلي خو دلته مسلې ډيرې دي نو کیدای شي دا ځل د لارې دا بندیدل لږ وخت واخلي او دې لپاره سمه طریقه جوړه شي.»
دوه ورځې وړاندې د دغې لارې له تړل کېدو وروسته يوه طالب چارواکي رسنیو ته ويلي و، د دروازې تړلو لامل د پاکستان له لوري د بار وړونکو موټرو چلوونکو د پاسپورټ او ویزې غوښتنه ده، چې د افغان حکومت له لوري هم له پاکستاني موټر چلوونکو د ویزې او پاسپورت غوښتنه کېږي او اوس لپاره دواړو خواوو ته د موټر تګ راتګ بند دی.
په پېښور کې د ګمرک چارواکو افغانستان انټرنشنل پښتو ته دوه ورځې مخکې ویلي و، چې د تورخم په دروازه د بار وړونکو موټر چلوونکو لپاره په پاسپورټ او ویزې د تګ راتګ پرېکړه یې پلي کړې او له دې وروسته به یوازې هغه موټر چلوونکي پاکستان ته د ننوتو اجازه لري، چې پاسپورټونه او وېزې لري.
د تورخم دروازې له تړل کېدو وروسته د ډیورنډ کرښې دواړو غاړو ته تر زرو زیات لوی بار وړونکي ګاډي ولاړ دي او داسې اندېښنې هم دي چې په دغو لاریو کې بار شنې سبزۍ او تازه میوې ورستېدو ته نږدې شوې دي.
د بار وړونکو موټرو چلوونکو لپاره د پاسپورټ او ویزې موضوع یوه میاشت وړاندې هم د افغانستان او پاکستان تر منځ راپورته شوې وه چې بیا د دواړو هیوادونو د چارواکو تر منځ د یوې پرېکړې په پایله کې بې وېزې چلوونکو ته یوه میاشت وخت ورکړ شو چې اوس د هغه ضرب الاجل د پای ته رسېدو سره سم د تورخم دروازه تړل شوې.
