مالدیف له هند څخه وغوښتل چې تر دوو میاشتو پورې خپل ځواکونه وباسي
د مالدیف چارواکو نن د هند پر حکومت غږ وکړ، چې د مارچ تر ۱۵مې خپل ټول ځواکونه له دغه هېواد وباسي. د مالدیف ولسمشر محمد مویزو تېر کال د ټاکنو ګټلو سره په داسې حال په خپل هېواد کې د هند لومړۍ پالیسي د ختمولو ژمنه وکړه، چې نوی ډېلی او بېجینګ پکې د نفوذ سیالي لري.
د رویټر د راپور له مخې؛ ښايي دا ګام د نوي ډېلي او مالدیف اړیکي خراب کړي.
د هند نږدې اتیا سرتېري په مالدیف کې دي، چې دغه هېواد ته د ور کړل شویو تجهیزاتو ملاتړ برابر او په سیمه کې د انساني چارو لپاره مرسته برابره کړي.
د مالدیف ولسمشر نن د دغه هېواد بهرنیو چارو وزارت کې د هندي پلاوي سره لیدنه کې غوښته وکړه، چې خپل ځواکونه وباسي.
د مالدیف د ولسمشرۍ دفتر د پالیسۍ مشر احمد نظیم وايي؛ ولسمشر له هندي پلاوي وغوښتل چې د مارچ تر ۱۵ ټول ځواکونه وباسي.
نوموړی زیاتوي چې په دې هکله خبرې روانې دي.
مویزو د ولسمشرۍ ټاکنو په کمپاین کې هم د هند پراخ نفوذ د خپل هېواد حاکمیت ته لوی ګواښ بللی و او ژمنه یې کړې وه، چې ځواکونه به یې له خپلې خاورې وباسي.
ښاغلی نظیم هم وايي، چې د حکومت پالیسي او د ولس غوښتنه هم دا ده چې د هند ځواکونه باید و اېستل شي.
د هند بهرنیو چارو وزارت هم خپله اعلامیه کې ویلي، چې له مالدیف سره یې پر مختلفو مسالو خبرې درلودې؛ خو د پوځ اېستلو ته یې اشاره نه ده کړې.
چین ته د مالدیف د ولسمشر د تېرې اونۍ په سفر پسې بېجینګ او دغه هېواد د اړیکو پراخولو لپاره د ستراتیژیک ټولیز مشارکت سلا شول.
دې سره چین ته په دغه اسیايي هېواد کې د پراخې پانګونې زمنیه برابرېږي.
نړۍوال بانک وايي؛ مالدیف د چین ۱.۳۷ میلیارده ډالره پوروړی دی، چې د دغه هېواد د پور ۲۰ سلنه جوړوي.
