د طالبانو د کډوالو چارو وزارت: له پاکستانه سلګونه افغان کډوال هېواد ته ستانه شول
د طالبانو د کډوالو او بېرته ستنېدونکو چارو وزارت په اېکس پاڼه لیکلي، چې له پاکستانه ۴۰۵ تنه کډوال د تورخم او سپین بولدک له لارې هېواد ته ستانه شوي دي. د ننګرهار ولایت د تورخم د سرحدي امریت د راپور له مخې، ۴۳ کورنۍ چې ټولټال ۲۲۳ تنه کېږي په جبري توګه هېواد ته ستنې کړای شوې دي.
دوی وایي، د کډوالۍ په ریاست کې تر ثبتېدو وروسته دغه کډوال د مرستو ترلاسه کولو په موخه د ملګرو ملتونو عالي کمېشنرۍ او د کډوالۍ نړۍوال سازمان ته ورپېژندل شوي دي.
له بلې خوا په کندهار ولایت کې د سپین بولدک د سرحدي امریت د مالوماتو پر بنسټ، ۳۶ کورنۍ چې ټولټال ۱۸۲ کسان کېږي په جبري توګه هېواد ته ستنې کړای شوې دي.
دغه کډوال په کډوالۍ ریاست کې تر ثبتېدو وروسته د مرستو ترلاسه کولو په موخه د ملګرو ملتونو عالي کمېشنرۍ، د خوړو نړۍوال پروګرام او د کډوالۍ نړۍوال سازمان ته ورپېژندل شوي دي.
د پاکستاني چارواکو د شمېرو له مخې، لاهم لږ تر لږه ۱۷ لکه بې اسناده کډوال په دغه هېواد کې مېشت دي او په وینا یې د دغو کډوالو د اېستنې لړۍ په منظمه توګه روانه ده.
پاکستان د اکټوبر په درېیمه وروسته له هغه دغه پرېکړه وکړه، چې په دغه هېواد کې تاوتریخوالی او د امنیت ضد پېښې زیاتې شوې او د پړې ګوته یې افغان کډوالو ته ونیوله.
افغانستان ته له پاکستانه د جمعیت العلمای اسلام ګوند د مشر مولانا فضل الرحمان په مشرۍ تللي پلاوي ویلي، چې د افغان کډوالو د اېستلو په برخه کې د پاکستان حکومت وروستۍ پرېکړه سمه نه وه او په دې سره د افغان کډوالو ټول بشري حقونه له پامه غورځول شوي دي.
دغه پلاوي ویلي، چې په دې اړه هغوی پخوا هم د اعتراض غږ اوچت کړی او تر دې وروسته به هم د پاکستان له حکومت سره خبرې کوي، چې د دغو کډوالو په اېستلو کې له زغمه کار واخلي.
