باجوړ کې د یوه قومي مشر پر موټر چاودنې مرګژوبله اړولې ده
په باجوړ کې د یوه قومي مشر پر موټر بمي برید کې د هغه په ګډون دوه تنه ټپیان شوي او یوه مېرمن هم وژل شوې ده. دغه چاودنه چې د دغه راپور له خپرولو نیم ساعت وړاندې د باجوړ په اتمانخېلو کې شوې موخه یې قومي مشر میا حضرت ګل و، چې په دغه برید کې ټپي شوی دی.
میا حضرت ګل چې ویل کېږي د پاکستان له حکومکت سره نږدې کس دی، څو ورځې وړاندې یې په اعتراضي ډول له حکومته غوښتي و چې نور ولسونه له دې زیاته قرباني نه شي ورکولای باید دغه روان کړکېچ د جرګو او مرکو له لارې پای ته ورسېږي.
تر دغه برید وړاندې د خیبر پښتونخوا په نورو سیمو په تېره بیا په وزیرستان کې هم په ورته چاودنو کې قومي مشران په نښه شوي وو.
دغه چاودنې په پاکستان کې د راتلونکو ټاکنو په درشل کې کېږي او یو شمېر کړۍ غواړي، چې دغه ټاکنې وځنډول شي؛ خو حکومت ته نږدې سرچینې وايي، چې ټاکنې پخوا هم په ترینګلو حالاتو کې ترسره شوې او دا پلا به هم به ټاکلې نېټه ترسره کېږي.
