مولوي فضل: له هغو نوماندانو سره جهاد واجب دی چې د دین په نوم رایه اخلي او شریعت نه نافذوي
د پښتون ژغورنې غورځنګ غړی مولوي فضل وايي، کوم کس چې پارلمان ته په تللو سره شریعت نافذ نه کړي او بیا د دین او مذهب په نوم له خلکو رایه اخی، «جهاد ور سره واجب دی.» مولوي فضل دا خبرې پرون د سوېلي وزیرستان په مرکز واڼه کې واڼه پرېس کلب کې کړې دي.
نوموړی په خپلو خبرو کې د پاکستان د پخواني لوی مفتي فرید فتوا یادوي او زیاتوي: که یو ملا د شریعت په نوم رایه وغواړي او اسمبلي ته لاړ شي، خو هلته د شریعت مطالبه ونه کړي او یا شریعت نافذ نه کړي او که شریعت یې نافذولی نه شو، له پارلمان استعفا ونه کړي او بیا پارلمان ته د تلو لپاره د دین په نوم رایه غواړي، نو له دغه سړي سره جهاد واجب دی.
د نوموړي په خبره، دا ډول کسان چې د دین په نوم رایه اخلي، پر اسلام تمسخر کوي.
که څه هم مولوي فضل کوم مشخص ګوند ته ګوته ونه نیوله، خو په وزیرستان کې تر ډېره د مولانا فضل رحمان ډله چې ځان مذهبي بولي پراخ نفوذ لري.
د مولوي فضل دا خبرې په داسې حال دي چې راتلونکې فبروري پر اتمه په پاکستان کې ټولټاکنې کېږي.
د دې ټاکنو ته د کمپاین پیلېدو سره په مختلفو سیمو په تېره وزیرستان کې پر نوماندانو هم بریدونه پیل شوي دي.
پرون د شمالي وزیرستان مرکز سره نږدې د پښتونخوا صوبايي اسمبلۍ ته ازاد نوماند کلیم الله داوړ د وسلوالو په برید کې ووژل شو.
تر هغه مخکې د پاکستان د قامي اسمبلۍ پر پخواني غړي او د پي ډي اېم پر مشر محسن داوړ هم په دغه سیمه کې برید شوی و.
