د پاکستان د اطلاعاتو لنډمهاله وزیر: حکومت د ټاکنو د ځنډولو واک نه لري
د پاکستان د اطلاعاتو لنډمهاله وزیر مرتضی سولنګي ویلي دي، لنډمهاله اداره دا واک نه لري چې د فبرورۍ په اتمه نېټه ټاکل شوې عمومي ټاکنې وځنډوي. د پاکستان دولتي راډیو د سه شنبې په ورځ وویل، د تاوتریخوالي د پراخې وېرې له امله په پاکستان کې به ټاکنې نورې هم وځنډول شي.
د پاکستان پخواني لومړي وزیر عمران خان او د سیاسي چارو کارپوهانو په پرله پسې ډول وېره څرګنده کړې، چې په دغه هېواد کې به ټاکنې وځنډېږي ځکه چې امنیتي او اقتصادي وضعیت یې کړکېچن دی.
د پاکستان د اطلاعاتو او نشراتو سرپرست وزیر مرتضی سولنګي وايي، لنډمهاله حکومت د ټاکنو د ځنډولو واک نه لري.
خبرپاڼه زیاتوي، چې د اطلاعاتو وزیر دغه څرګندونې د پاکستان ټلویزیون (پيټيوي) د یوه پروګرام پر مهال وکړې.
سولنګي وويل، دا د اساسي قانون د ٢١٨ (٣) مادې له مخې په هېواد کې د ټاکنو نېټه ورکول او يا بدلول د ټاکنو خپلواک کمېسيون واک دى.
راډيو پاکستان وويل:« وزير ومنله چې ستونزې شته؛ خو هومره جدي نه دي، چې ټاکنې دې وځنډوي.»
هغه د فبرورۍ په اتمه د ازادو، عادلانه او رڼو ټاکنو د ترسره کولو لپاره د حکومت پر هوډ ټینګار وکړ، چې د ټاکنو د څار بنسټ څخه "بشپړ ملاتړ" کوي.
پاکستان اوس مهال د لنډمهاله لومړي وزیر انوارالحق کاکړ په مشرۍ د لنډمهاله حکومت لهخوا پرمخ وړل کېږي، چې موخه یې د عمومي ټاکنو څارنه ده.
