باورې سرچينې: د پېښور د ترهگرۍ ضد محکمې مخې په ډزو کې درې کسان ژوبل شوي دي
باوري سرچینې وايي نن سهار دوشنبه (د مرغومي ۱۸مه) په پېښور کې د ترهګرۍ ضد محکمې ودانۍ مخې د وکیلانو په جامو کې یو وسله وال پر ولاړو کسانو ډزې کړې چې لږ تر لږه درې تنه یې ټپیان کړي. پولیس وايي وسله وال کس یې تر ډزو وروسته ژوندی نیولی دی.
پېښه هغه مهال رامنځته شوې چې د دغې محکمې د ودانۍ مخې ته د خلکو ګڼه ګوڼه وه.
سرچینې وايي د پیښې ټپیان ورڅېرمه روغتون ته لیږدول شوي دي.
له دې پیښې سره همهاله د خیبر پښتونخوا په باجوړ کې د پولیسو پر موتر د ماین چاودنې له امله پنځه پولیس وژل شوي و او ۲۲ نور ټبیان دي.
په دې وروستیو کې د خیبر پښتونخوا په بیلابیلو سیمو کې امنیتي حالت تر پخوا ترینګلی شوی.
