د پاکستان سترې محکمې نواز شریف ته د څلورم ځل لپاره د نوماندېدو اجازه ورکړه

د پاکستان سترې محکمې د دوشنبې په ورځ هغه حکم لغوه کړ، چې په جنایي جرمونو محکوم شویو کسانو ته یې د ټول عمر لپاره په ټاکنو کې د ګډون اجازه نه ورکوله او په دې توګه یې نواز شریف ته لاره هواره کړه، چې د څلورم ځل لپاره ځان نوماند کړي.

د ښاغلي شریف ګوند (د پاکستان مسلم لیګ – نواز) په داسې حال کې د فېبرورۍ د اتمې نیټې ټولټاکنو مخکښ ګوند بلل کیږي، چې د ښاغلي شریف اصلي سیال پخوانی لومړی وزیر عمران خان په زندان کې دی او د پنځو کلونو لپاره له نوماندیدو منع شوی دی.

قاضي فایز عیسی چې د قاضيانو د اوه کسیزې ډلې مشري یې کوله، په خپل حکم کې ویلي، چې د ټول بندیز "ټاکنو کې د ګډون لپاره د وګړو اساسي حق زیانمنوي".

د قاضیانو له اوه کسیزې ډلې، شپږو یې د هغه حکم د لغوه کولو لپاره مثبته رایه وکړه، چې په ۲۰۱۸ کال کې تصویب شوی و او د اساسي قانون له ځینو احکامو سره سم یې په هغو محکوم شویو سیاستوالو باندې د ټول عمر لپاره په ټاکنو کې د ګډون بندیز لګولی و.

۷۴ کلن شریف په ۲۰۱۷ کال کې د ناریښتنو کړنو په تور مجرم وپېژندل شوی وو، چې د ۲۰۱۸ کال د محکمې د حکم له مخې په ټاکنو کې د ټول عمر لپاره له ګډون منع کېدونکو کې شمېرل کېده.