بلوڅ لاریون کوونکي: د بلوڅانو د نسل وژنې پر ضد خپله مبارزه روانه ساتو
د بلوڅانو د نسل وژنې پر ضد د زرګونو معترضو بلوڅانو لاریون له تېرو ۴۶ ورځو راهیسې روان دی. دغه بلوڅان ادعا کوي چې «د پاکستان حکومت له لوري بېګناه بلوڅان وژل او تیري تم کیږي.»
د بلوڅ لاریون کوونکو سرلارې او د بشري حقونو فعاله ماه رنګ بلوڅ په یوه ویډیويي پیغام کې له نړیوالو غوښتنه کوي چې د بلوڅ نسل وژنې پر ضد له یاد غورځنګ سره یو ځای شي.
نوموړي وايي: «زه له ټولو څخه غوښتنه کوم چې د بې عدالتۍ په وړاندې غږ پورته کول خپله اصلي دنده وګڼي. تاسو کولی شئ په فعاله توګه د بشري حقونو سازمانونو سره اړیکه ونیسئ، د بلوڅانو مسلو ته پاملرنه وکړئ. ستاسو غږ د بلوڅانو په وړاندې د پاکستاني چارواکو د سرغړونو په اړه د حساب ورکولو لپاره قوي وسیله ده.»
د بلوڅو پیوستون غورځنګ د دوشنبې په ورځ د (مرغومي په ۱۸مه) د اسلام اباد پریس کلب مخې ته د لاریون کوونکو ماشومانو یوه ویډیو خپره کړې، په ویډیو کې لیدل کیږي چې ماشومان د خپلو تري تم شویو خپلوانو انځورونه له ځان سره لري او شعارونه ورکوي چې، «د بلوڅانو نسل وژنه ودروئ.»
دغه بلوڅ لاریون کوونکي وایي، «د بلوڅ نسل وژنې پر ضد خپل مقاومت ته دوام ورکوو.»
تېره ورځ د بلوڅانو د نسل وژنې پر ضد د پاکستان په کراچۍ ښار کې هم زرګونو بلوڅانو لاریون وکړ.
له تېرې یوې نیمې میاشتې راهیسې د پاکستاني پولیسو له لوري د یاد لاریون د پای ته رسولو هڅې کیږي خو بلوڅ لاریون کوونکي وايي، د خپلو غوښتنو د ترلاسه کېدو تر وخته به اعتراضونو ته دوام ورکوي.
