اټکل کیږي چې مولانا فضل الرحمان نن کندهار ته سفر وکړي
د پاکستان د جمعیت علمای اسلام ګوند مشر مولانا فضل الرحمان چې د یکشنبې په ورځ (د مرغومې ۱۷ مه) د یوه پلاوي په مشرۍ کابل ته رسېدلی، داسې اټکل کیږي چې هغه نن د طالبانو د مشر ملا هبتالله د لیدلو په موخه د افغانستان کندهار ولایت ته سفر وکړي.
د طالبانو حکومت لا په رسمي ډول څه نه دي ويلي چې د دغې ډلې مشر به له مولانا فضل الرحمان سره وګوري که نه، خو مولانا فضل الرحمان کابل ته له خپل سفر وړاندې له رسنیو سره په خبرو کې ویلي و چې د طالبانو له مشر ملا هبتالله سره هم ګوري.
واک ته د طالبانو له رسیدو وروسته د تېرو څه باندې دوو کلونو په تېرېدو د دغې ډلې مشر ملا هبتالله یوازې د قطر د بهرنیو چارو له وزیر لیدلي.
کابل ته د یو شمېر بهرنیو هیوادونو مهمو څېرو او نړېوالو سازمانونو استازو هم غوښتي چې د طالبانو له مشر ملا هبتالله سره وګوري خو د دغې ډلې له لوري ورته د لیدو اجازه نه ده ورکړل شوې.
مولانا فضل الرحمان تېره ورځ د یوه پلاوي په مشرۍ کابل ته رسېدلی او د طالبانو د رییس الوزرا له سیاسي مرستیال مولوي عبدالکبیر سره په کتنه کې یې ویلي، چې له پاکستانه د افغان کډوالو ایستل غندي.
مولانا فضل الرحمان له پاکستانۍ رسنۍ جیو نیوز سره د یوې مرکې پر مهال ويلي چې کابل ته تر تلو وړاندې د پاکستان د بهرنیو چارو وزارت له لوري ورته لارښوونې شوې خو دا یې نه دي ويلي چې دی په افغانستان کې له لارښوونې سره سم به پر کومو موضوع ګانو تم کیږي.
د طالبانو تر کنټرول لاندې د ارګ له ایکس پاڼې تېره ورځ په خپرې شوې خبرپاڼه کې د مولوي کبیر له قوله ویل شوي، چې افغانستان او پاکستان دواړه اسلامي هېوادونه دي چې ګډ مشترکات لري او باید ستونزې د خبرو له لارې حل کړي. نوموړي زیاته کړې: «موږ باید د یو بل لپاره د ګټې په میدانونو بدل شو او بل سره همکاري وکړو.»
په اعلامیه کې راغلي، چې مولوي عبدالکبیر هیله ښودلې، چې کابل ته د ملا فضل الرحمان سفر به د افغانستان او پاکستان ترمنځ د اړیکو په پراختیا او د ((غلط فهمۍ)) په راکمولو کې مرسته وکړي.
نوموړي ملا فضل الرحمان ته ډاډ ورکړی، چې د افغانستان له خاورې به هیچا ته ګواښ نه متوجه کیږي او ویلي یې دي، چې د ادعاو او پروپاګند پر ځای به ښه دا وي، چې پر واقعیتونو ولاړ بحث وشي.
