بلاول: د پاکستان ټولټاکنې به د فبروري په اتمه ترسره کیږي
د پاکستان پيپلز (خلکو) ګوند مشر بلاول بوټو زرداري ویلي، که چیرې ملګري ملتونه او د اسلامي همکاریو سازمان هم موافقه ونکړي، بیا به هم د پاکستان ټاکنې د فبروری په اتمه نیټه ترسره کیږي.
د پاکستان د جیو نیوز ټلویزیون د راپور له مخې، بلاول بوټو د شنبې په ورځ لاهور کې خبریالانو سره د خبرو پر مهال ټینګار کړی چې که چیرې ملګري ملتونه او د اسلامي همکاریو سازمان هم موافقه ونکړي، بیا به هم د پاکستان ټاکنې د فبروری په اتمه نیټه ترسره کیږي.
د نوموړي په وینا، د پاکستان قاضي القضات ویلي چې دا د کاڼي کرښه ده چې ټولټاکنې به د فبرورۍ په اتمه ترسره کیږي او زیاته کړې یې ده: "موږ په هېواد کې رڼې او بې طرفه ټولټاکنې غواړو."
بلاول وايي، د لاهور په اړه داسې انځور ورکول کیږي چې ګواکي دلته د شاتو او شیدو سیندونه بهیږي، لاهور چې څومره کار ته اړتیا لري ټول پاکستان یې نه لري، دلته عامو خلکو ستونزو ته نه بلکې اشرافیان ته پاملرنه کیږي.
بلاول ټینګار کړي چې د دوی ګوند د برابرۍ په سیاست باور لري او دا چې په هېواد کې د ازادو او منصفانه ټولټاکنو غوښتونکي دي.
د پاکستان سنا د جمعې په ورځ د یو پرېکړه لیک په تصویبولو سره پریکړه کړې وه چې د فبروری د اتمې نیټې ټاکنې نورې هم وځڼډوي.
د دغه پریکړه لیک د تصویب پر مهال په سنا مجلس کې یوازې ۱۴ غړي حاضر وو او یوازې د مسلم لیګ سناتور افنان الله د دغه پریکړه لیک سره مخالفت کړی و. د سنا مجلس لخوا تصویب شوی پریکړه لیک کوم الزامیت نه لري په دې معنی نه ده چې د پاکستان ټاکنې به نورې هم وځنډول شي.
