د طالبانو د پولیسو د لوړو زدکړو قومنداني وايي، تر اوسه یې پنځه زره طالب افسران فارغ کړي

د طالبانو د کورنیو چار وزارت د پولیسو د لوړو زدکړو قومندانۍ قومندان وايي، تر اوسه یې له دې مرکز پنځه زره طالب افسران فارغ کړي. نوموړي پرون د مدیریت او رهبرۍ برخه کې له یوې میاشتې روزنې ترلاسولو وروسته د فارغ شوو ۳۰۰ افسرانو غونډه کې د کورنیو چارو وزارت پر مسلکیتوب ټینکار وکړ.

عبدالهادي منعم وايي، چې د دې کسانو سره یې د بېلابیلو ولایتونو پنځه زره کسان په ۱۲ دورو کې د مدیریت او رهبرۍ په برخو کې فارغ کړي دي.

د طالبانو کورنیو چارو وزارت مسوولانو وویل چې دغه یوه میاشت روزل شوي نوي فارغ طالبان به د وزارت په بېلابیلو برخو کې په دندو وګمارل شي.

د طالبانو د کورنیو چارو وزارت اداري معین ستر پاسوال مولوي نور جلال جلالي فرغت غونډې ته وویل: «باید د شرعي نظام ساتنه وکړو او باید د نظام د ساتلو لپاره ظرفیتونه لوړ شي.»

طالبانو ته د تېر جمهوري نظام جوړ دولتي سیسټم په میراث پاتې شو او د پخواني حکومت په اداري سیسټم روان دي.

وویل کیږي چې د تېر نظام زیات شمیر کارکوونکي اوس هم د طالبانو واک لاندې ادارو کې پر کار بوخت دي.

نیوکې دا دي چې طالبان غواړي خپل کسانو ته روزنه ورکړي او د وخت په تېریدو سره په ټولو دولتي ادارو کې د خپلې ډلې کسان وګماري.