طالبانو په خوست کې له اتو زرو زیاتو وزیرستاني کډوالو سره مرسته کړې
د طالبانو د کډوالو چارو وزارت وايي، په خوست ولایت کې یې د پاکستان له وزیرستانه له راغلو کورنیو سره مرستې کړې دي. طالبانو ویلي، چې له اته زره او ۶۷۱ وزیرستاني بې ځایه شویو کورنیو سره یې د خوراکي توکو او نغدو پیسو مرسته کړې ده.
دغه وزارت زیاته کړې، چې یادې کورنۍ پخوا په خوست ولایت کې د دې ډلې د کډوالو چارو ریاست له خوا د مرستې وړ وپېژندل شوې وې.
د کډوالو چارو وزارت د خبرپاڼې له مخې، په دغو مرستو کې د خوراکي توکو د نړيوال پروګرام له لوري څلور ډوله خوراکي توکي او د کډوالو په چارو کې د ملګرو ملتونو د عالي کمېشنرۍ له لوري ١٢ زره افغانۍ نغده مرسته شامله ده. طالبانو ویلي، چې دوی دغه مرستې د یوې میاشتې کار په بدل کې وېشلې دي.
نغدې مرستې د خوست ولایت په مرکز، سپېرې، ګربزو ولسوالیو کې د سړکونو، کانالونو او پلچکونو د جوړولو او د غرو په لمونو کې د اوبو د راویستلو په بدل کې ویشل شوي دي.
وزیرستان د پاکستاني طالبانو د تحریک یو له مهمو اډو څخه بلل کیږي او له دې سیمې د افغانستان ځینو برخو ته د کډوالو راتللو ډیر غبرګونونه راپارولي دي.
افغانستان ته د وزیرستاني کډوالو راتللو په دغه هېواد کې د پاکستاني طالبانو د فعالیتونو د زیاتېدو د احتمال په اړه هم اندېښنې راپورته کړې دي.
پاکستان وايي، د پاکستاني طالبانو تحریک غړي له افغانستان سره په سرحدي سیمو کې په ازاده توګه تګ راتګ کوي او له هغه ځایه په پاکستان کې وسله وال بریدونه پلانوي.
