رحمت الله نبیل د کرمان بریدونو ته په غبرګون کې له طالبانو سره د سیمې پر تعامل نیوکه وکړه
د افغانستان د جمهوریت د وخت د ملي امنیت لوی رییس رحمت الله نبیل او یو شمیر نورو افغان سیاستوالو د ایران په کرمان کې د وروستي خونړي برید په غندلو له طالبانو سره د سیمې پر تعامل نیوکه کړې ده.
د ایران په کرمان ولایت کې پرون د دغه هېواد د سپاه پاسدران د قدس ځانګې د وژل شوي مشر د قاسم سلیماني څلورم تلین کې چاودنو تر سلو ډېر کسان ووژل.
رحمت الله نبیل د دغه برید په غندلو سره ویلي، خپل اېکس کې د د یوه فارسي متل په لیکلو سره ویلي، «د طالبانو پر وړاندې د سیمې د هېوادونو د تعامل او ملاتړ په اړه باید ووایو، چې اش به مو خوړلی نه وي خو دود به یې ستاسو سترګې ړندې کړي.»
د ملي مقاومت مشر احمد مسعود په خپلې اېکس پاڼې لیکلي، چې «د ترهګرو ناوړه پدیده له کلونو راهیسې د سیمې د هیوادونو لمن نیولې او تل زمونږ خلک پکې قرباني کیږي.»
نوموړي زیاته کړه، افغانستان د سیمې او نړۍ په امنه ترهګریزه ځاله بدله شوې ده.
د افغانستان د بهرنیو چارو پخواني وزیر رنګین دادفر سپنتا هم ویلي، چې باید له نړیوالې ترهګرۍ سره سیمه ییزه مبارزه وشي.
له دې سره، د طالبانو د بهرنیو وزارت بیا د ایران په کرمان کې بریدونه ترهګریز نه دي بللي.
دغه وزارت د شویو بریدونو په اړه په خپره شوې خبرپاڼه کې د (ترهګریزې برید) د کلمې له کارولو ډډه کړې، خو دغه برید یې غندلی دی.
په اعلامیه کې یوازې لیکل شوي، چې دغه ډله د ایران له دولت او خلکو سره په غم کې شریکه ده.
