د پاکستان پوځ: په خیبر پښتونخوا کې د یوه ځانمرګي بریدګر په ګډون څلور کسان وژل شوي
د پاکستان پوځ د سه شنبې په ورځ وویل، په خیبر پښتونخوا کې د استخباراتي معلوماتو پر بنسټ په یو لړ عملیاتو کې د یوه ځانمرګي په ګډون څلور وسلهوال وژل شوي دي.
د پوځ د عامه اړیکو څانګې په وینا، دغه عملیات د شمالي وزیرستان په ناکراره قبایلي سیمه کې د وسلهوالو د له منځه وړلو لپاره ترسره شوي.
د دغې څانګې په خبره، د عملياتو پر مهال د امنيتي ځواکونو او تندلارو ترمنځ سخته نښته شوې چې په پایله کې يې څلور مشکوک کسان وژل شوي دي.
له وژل شويو وسلهوالو څخه وسلې، مهمات او چاودېدونکي توکي هم ترلاسه شوي دي.
دغې څانګې زیاته کړه، چې د نورو ګواښونو د له منځه وړلو لپاره په شاوخوا سیمو کې عملیات روان دي.
د پاکستان د پوځ په وینا، په تېر یوه کال کې په لویدیځو سیمو کې چې د افغانستان سره ګډه پوله لري د وسلهوالو مخالفینو په تاوتریخوالي کې زیاتوالی راغلی.
په شمالي وزیرستان کې دغه عملیات یوه ورځ وروسته له هغې کېږي، چې د همدې ولسوالۍ په میرعلي سیمه کې د شپږو کسانو جسدونه، چې د پنجاب ایالت اوسېدونکي وو، وموندل شول.
د پاکستان پوځ وویل، د یکشنبې په ورځ یو پاکستانی عسکر وروسته له هغه ووژل شو چې د "افغانستان دننه" وسلهوالو په شمالي وزیرستان کې د پاکستان په سرحدي پوسته ډزې وکړې.
په داسې حال کې چې د پاکستاني پوځ په وینا، د باجوړ په ولسوالۍ کې د افغانستان سره د پاکستان پولې ته د ننوتلو په وخت کې درې وسلهوال ووژل شول.
یوه چارواکي وویل، نامعلومو مشکوکو کسانو تېره اونۍ د خیبرپښتونخوا په بنو ولسوالۍ کې د نجونو یو حکومتي ښوونځی سوځولی چې په سیمه کې یې د خلکو لپاره د وسلهوال تاوتریخوالي د زیاتېدو وېره راپارولې ده.
