د جمعیت علمای اسلام ګوند پر غړي او نوماند قاري خیرالله د ماین چاودنه شوې ده
د خېبر پښتونخوا د باجوړ پولیسو ویلي، چې نن په باجوړ کې د جمعیت علمای اسلام ګوند غړي او له همدغې سیمې صوبايي اسمبلۍ ته نوماند قاري خیرالله پر موټر بمي چاودنه شوې، چې نوموړی ترې روغ وتلی دی.
پولیسو ویلي، چې پېښه په داسې مهال رامنځته شوې، چې قاري خیرالله د خپلو کمپاینو منډو ترړو په لړ کې یادې سیمې ته تللی و.
د جمعیت علمای اسلام ګوند یوه غړي مولانا ناصح پر خپل ټویټر یاده پېښه تایید کړې او ویلي یې دي، چې په پېښه کې قاري خیرالله ته کوم زیان نه دی اوښتی.
دا د جمعیت علمای اسلام پر غړو په نېږدې وخت کې دویمه هدفي چاودنه ده چې کیږي.
همداراز د پاکستان پولیس وايي، داسې راپورونه ورته رسېدلي چې ښايي د دغه هېواد د جمعیت علمای اسلام ګوند مشر مولانا فضلالرحمان پر زوی اسد محمود وسلهوال برید وشي.
د پاکستان ډان ورځپاڼې راپور ورکړی، چې د دېره اسماعیلخان پولیسو اسد محمود ته د چهارشنبې ورځ د جنورۍ په ۳مه سپارښتنه کړې چې خپلې لیدنې کتنې محدودې کړي او د ځان ساتلو له پاره باید هوښیار اوسي.
سلیم خان چې د پاکستان د پولیسو یو لوړپوړی چارواکی دی، اسد محمود ته په یوه لیک کې لیکلي:« داسې ګواښونه شته، چې وسلهوالې ډلې به هغه په سفر او یا د هغه د استوګنې پر مهال په نښه کړي.»
