د پاکستان مشهور سیاستوال سرتاج عزیز د ۹۴ کلونو په عمر ومړ
سرتاج عزیز د پاکستان یو اقتصاد پوه او ستراتیژیست و، چې د بهرنیو چارو د وزیر، مالیې وزیر او د پاکستان د ملي امنیت د سلاکار په توګه یې دندې ترسره کړې وې. هغه د مسلم لیګ ن یو مرکزي مشر هم پاتې شوی دی، چې تېره ورځ د ۹۴ کلونو په عمر په اسلام اباد کې ومړ.
ښاغلی عزیز په ۱۹۲۹ کال کې د برتانوي هند په شمال لویدیځ کې زېږیدلی و او د زدهکړو پر مهال د پاکستاني غورځنګ د فعالانو څخه شمېرل کېده.
ښاغلي عزیز په ۱۹۵۰ کال کې له هارورډ پوهنتون څخه خپله ماسټري ترلاسه کړې وه.
هغه د پاکستان لپاره ځینې ګټورې اقتصادي تګلارې جوړې کړې دي، چې لاهم په دغه هېواد کې پلې کېږي.
نوموړی له ۱۹۸۵ تر ۱۹۹۹ پورې د پاکستان د مشرانو جرګې غړی پاتې شوی.
د پاکستان ولسمشر، لنډ مهاله لومړي وزیر او نورو سیاستوالو د هغه په مړینه خواشیني ښودلې او د هغه مړینه یې د پاکستان له پاره نه جبرانېدونکې ضایعه بللې ده.
